حضرت ابو نضرہ فرماتے ہیں کہ حضرت ابو سعید نے ارشاد فرمایا: آپس میں حدیث بیان کیا کرو، اس لیے کہ حدیث ہی حدیث کو ابھارتی ہے۔ [مصنف ابن ابي شيبه/ كتاب الأدب/حدیث: 27814]

حضرت عبد اللہ بن بریدہ فرماتے ہیں کہ حضرت علی رضی اللہ عنہ نے ارشاد فرمایا: باہم ملاقات کیا کرو۔ اور حدیث کا مذاکرہ کیا کرو اگر تم ایسا نہیں کرو گے تو حدیث مٹ جائے گی۔ [مصنف ابن ابي شيبه/ كتاب الأدب/حدیث: 27815]

حضرت عکرمہ فرماتے ہیں حدیث کا مذاکرہ کیا کرو، بیشک اس کا مذاکرہ کرنا اس کو زندہ رکھنا ہے۔ [مصنف ابن ابي شيبه/ كتاب الأدب/حدیث: 27816]

حضرت اعمش فرماتے ہیں کہ حضرت اسماعیل بن رجائ لکھنے والے بچوں کے پاس تشریف لاتے تھے اور ان کے سامنے اپنی حدیثیں پیش کرتے تاکہ آپ ان کو بھول نہ جائیں۔ [مصنف ابن ابي شيبه/ كتاب الأدب/حدیث: 27817]

حضرت عیسیٰ بن مسیب فرماتے ہیں کہ میں نے حضرت ابراہیم کو یوں فرماتے ہوئے سُنا کہ جب تم کوئی حدیث سنو تو تم اس کو بیان کردیا کرو جب بھی تم نے اس کو سناہو، اور اگر ایسا معاملہ ہو کہ تم نے اسے ایسے شخص کے سامنے بیان کردیا جو اس کا خواہش مند نہیں ہے تو یہ تمہارے سینہ میں کتاب کی طرح محفوظ ہوجائے گی۔ [مصنف ابن ابي شيبه/ كتاب الأدب/حدیث: 27818]

حضرت یزید فرماتے ہیں کہ حضرت عبد الرحمن بن ابی لیلیٰ نے ارشاد فرمایا: کہ علم حدیث کی بقا مذاکرہ کرنے میں ہے۔ اس پر حضرت عبد اللہ بن شداد نے ان سے فرمایا: کہ کتنی احادیث ایسی ہیں جو تم نے میرے سینہ میں باقی رکھی ہیں۔ [مصنف ابن ابي شيبه/ كتاب الأدب/حدیث: 27819]

حضرت اعمش فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: علم کی آفت بھولنا ہے، اور علم کا ضائع کرنا یہ ہے کہ اس کو نااہل کے سامنے بیان کیا جائے۔ [مصنف ابن ابي شيبه/ كتاب الأدب/حدیث: 27820]

حضرت قاسم فرماتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: علم کی آفت بھولنا ہے۔ [مصنف ابن ابي شيبه/ كتاب الأدب/حدیث: 27821]