حضرت ابو موسیٰ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس نے چوسر کھیلی اس نے اللہ اور اس کے رسول (صلی اللہ علیہ وآلہ وسلم) کی نافرمانی کی۔ [مصنف ابن ابي شيبه/ كتاب الأدب/حدیث: 27822]

حضرت بریدہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: جس شخص نے چوسر کھیلی گویا کہ اس نے اپنا ہاتھ خنزیر کے گوشت اور خون میں ڈبو دیا۔ [مصنف ابن ابي شيبه/ كتاب الأدب/حدیث: 27823]

حضرت سلیمان بن بریدہ سے رسول اللہ صلی اللہ علیہ وآلہ وسلم کا مذکورہ ارشاد اس سند سے بھی منقول ہے۔ [مصنف ابن ابي شيبه/ كتاب الأدب/حدیث: 27824]

حضرت قتادہ فرماتے ہیں کہ رسول اللہ صلی اللہ علیہ وآلہ وسلم سے نرد کے مہروں کے ساتھ کھیلنے کے متعلق سوال کیا گیا؟ آپ صلی اللہ علیہ وآلہ وسلم نے فرمایا: بیشک یہ تو عجمیوں کا جوا ہے۔ راوی کہتے ہیں کہ حضر ت قتادہ ہر چیز کے ساتھ کھیلنے کو مکروہ سمجھتے تھے یہاں تک کہ لاٹھی کے ساتھ کھیلنے کو بھی۔ [مصنف ابن ابي شيبه/ كتاب الأدب/حدیث: 27825]

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے چوسر کے مہروں کے ساتھ کھیلنے سے منع فرمایا۔ [مصنف ابن ابي شيبه/ كتاب الأدب/حدیث: 27826]

حضرت ابو ایوب فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: کہ مثال اس شخص کی جو چوسر کے دو مہروں سے کھیلتا ہے اور جوا نہیں لگاتا اس شخص کی سی ہے جو خنزیر کی چربی کا تیل تو لگاتا ہو اور اس کا گوشت نہ کھاتا ہو۔ [مصنف ابن ابي شيبه/ كتاب الأدب/حدیث: 27827]

حضرت مجاہد فرماتے ہیں کہ حضرت ابن عمر رضی اللہ عنہما نے ارشاد فرمایا: کہ میں اپنا ہاتھ خنزیر کے گوشت میں ڈالوں یہ میرے نزدیک زیادہ پسندیدہ ہے اس بات سے کہ میں چوسر کھیلوں۔ [مصنف ابن ابي شيبه/ كتاب الأدب/حدیث: 27828]

حضر ت برد بن معمر بن یزید فرماتے ہیں کہ میں نے حضر ت عائشہ رضی اللہ عنہا سے چوسر کے متعلق سوال کیا؟ آپ نے فرمایا: اللہ نے چوسر کو بھلائی سے دور کیا اور اللہ تعالیٰ نے اس کے کھیلنے والے کو بھی بھلائی سے دور کیا۔ [مصنف ابن ابي شيبه/ كتاب الأدب/حدیث: 27829]

حضرت ابو اشعث نخعی فرماتے ہیں کہ میں نے حضر ت ابن عباس رضی اللہ عنہما کو یوں فرماتے ہوئے سنا کہ کوئی خنزیر کے خون میں آلودہ ہوجائے یہ بہتر ہے اس سے کہ وہ چوسر کھیلے۔ [مصنف ابن ابي شيبه/ كتاب الأدب/حدیث: 27830]

حضرت جعفر کے والد فرماتے ہیں کہ حضرت علی رضی اللہ عنہ نے ارشاد فرمایا: کہ چوسر اور شطرنج جوا ہیں۔ [مصنف ابن ابي شيبه/ كتاب الأدب/حدیث: 27831]