حضرت نافع فرماتے ہیں کہ حضرت ابن عمر رضی اللہ عنہما نے ارشاد فرمایا: کہ جب کسی کے گھر میں چوسر کے مہرے پائے جاتے تو اس گھر کو توڑ دیا جاتا تھا اور جو شخص یہ کھیلتا تو اس کو مارا جاتا تھا۔ [مصنف ابن ابي شيبه/ كتاب الأدب/حدیث: 27832]

حضرت مسعر حضرت عبد الملک بن عمیر سے نقل کرتے ہیں کہ حضرت ابو الاحوص نے ارشاد فرمایا: جبکہ حضرت سفیان حضرت عبد الملک بن عمیر سے اور وہ حضرت ابوالاحوص سے نقل کرتے ہیں کہ حضرت عبد اللہ بن مسعود رضی اللہ عنہ نے ارشاد فرمایا: کہ تم ان نشان لگے مہروں سے بچو جن سے تمہیں ڈانٹا جاتا ہے، اس لیے کہ یہ جوا ہے۔ [مصنف ابن ابي شيبه/ كتاب الأدب/حدیث: 27833]

حضرت ابو موسیٰ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس شخص نے چوسر کھیلی تحقیق اس نے اللہ اور اس کے رسول (صلی اللہ علیہ وآلہ وسلم) کی نافرمانی کی۔ [مصنف ابن ابي شيبه/ كتاب الأدب/حدیث: 27834]

حضرت ابو ایوب فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: جس شخص نے چوسر کھیلی جوئے کے لیے گویا وہ خنزیر کا گوشت کھانے والے کی طرح ہے اور جو یہ کھیلے بغیر جوئے کے، گویا وہ خنزیر کی چربی کا تیل لگانے والے کی طرح ہے۔ [مصنف ابن ابي شيبه/ كتاب الأدب/حدیث: 27835]

حضرت بسام فرماتے ہیں کہ میں نے حضرت ابو جعفر سے چوسر کے متعلق پوچھا؟ تو آپ نے اسے مکروہ کہا۔ [مصنف ابن ابي شيبه/ كتاب الأدب/حدیث: 27836]

حضرت صلت الدھان فرماتے ہیں کہ حضرت علی رضی اللہ عنہ نے ارشاد فرمایا: میں ہانڈی کے نیچے رکھے جانے والے چمڑے کو ملوں یہ مجھے زیادہ پسند ہے اس سے کہ میں زعفران سے بنی ہوئی خوشبو ملوں۔ اور میں آگ کے دو انگاروں کو الٹ پلٹ کروں یہ مجھے زیادہ پسند ہے اس سے کہ میں چوسر کے مہروں کو الٹ پلٹ کروں۔ [مصنف ابن ابي شيبه/ كتاب الأدب/حدیث: 27837]

حضر ت مسلم فرماتے ہیں کہ حضرت علی رضی اللہ عنہ کا گزر چند لوگوں پر ہوا اس حال میں کہ وہ چوسر کھیل رہے تھے۔ آپ نے ان کو نصف النھار تک سزا دی۔ [مصنف ابن ابي شيبه/ كتاب الأدب/حدیث: 27838]