حضرت عمرو بن میمون فرماتے ہیں کہ میں ہر جمعرات کو حضرت عبد اللہ بن مسعود رضی اللہ عنہ کی خدمت میں آیا کرتا تھا۔ میں نے کبھی بھی آپ کو کسی معاملہ میں یوں فرماتے ہوئے نہیں سنا کہ ”رسول اللہ صلی اللہ علیہ وآلہ وسلم نے ارشاد فرمایا:“ پس ایک شام کو آپ نے فرمایا کہ رسول اللہ صلی اللہ علیہ وآلہ وسلم نے ارشاد فرمایا ہے۔ اس پر آپ کی حالت بدل گئی میں نے دیکھا کہ آپ کھڑے ہوگئے اس حال میں کہ آپ کی قمیص کے بٹن کھلے ہوئے ہیں۔ اور آپ کی آنکھوں میں آنسو بھر آئے۔ اور آپ کی رگیں پھول گئیں۔ آپ نے فرمایا: کہ یا تو اس سے کم فرمایا یا اس سے زیادہ یا اس کے قریب یا اس جیسا ارشاد فرمایا۔ [مصنف ابن ابي شيبه/ كتاب الأدب/حدیث: 27905]

حضرت ابن سیرین فرماتے ہیں کہ حضرت انس بن مالک رضی اللہ عنہ جب رسول اللہ صلی اللہ علیہ وآلہ وسلم کی کوئی حدیث بیان کرکے فارغ ہوتے تو فرماتے کہ ”یا جیسا کہ رسول اللہ صلی اللہ علیہ وآلہ وسلم نے ارشاد فرمایا۔“ [مصنف ابن ابي شيبه/ كتاب الأدب/حدیث: 27906]

حضرت عاصم فرماتے ہیں کہ امام شعبی نے ایک حدیث بیان فرمائی۔ آپ سے پوچھا گیا کہ کیا آپ یہ حدیث مرفوعاً بیان فرما رہے ہیں؟ آپ نے فرمایا: اس سے کم بیان کرنا ہمارے نزدیک زیادہ پسندیدہ ہے۔ اس لیے کہ اگر اس میں کوئی غلطی ہو یا کچھ زیادتی یاکمی ہو تو یہ ہمارے نزدیک زیادہ پسندیدہ ہے۔ [مصنف ابن ابي شيبه/ كتاب الأدب/حدیث: 27907]

حضرت ابن ابو لیلیٰ فرماتے ہیں کہ ہم لوگوں نے حضرت زید بن ارقم رضی اللہ عنہ سے درخواست کی کہ آپ ہمیں حدیث بیان کیجئے۔ آپ نے فرمایا: کہ ہم بوڑھے ہوگئے اور ہم بھول گئے اور رسول اللہ صلی اللہ علیہ وآلہ وسلم کی حدیث بیان کرنا تو بہت سخت معاملہ ہے۔ [مصنف ابن ابي شيبه/ كتاب الأدب/حدیث: 27908]

حضرت سائب بن یزید فرماتے ہیں کہ میں حضرت سعد بن مالک کے ساتھ مدینہ منورہ سے مکہ کی طرف نکلا، پس میں نے انہیں کوئی حدیث بیان کرتے ہوئے نہیں سنا یہاں تک کہ ہم واپس لوٹ آئے۔ [مصنف ابن ابي شيبه/ كتاب الأدب/حدیث: 27909]

حضرت توبہ عنبری فرماتے ہیں کہ امام شعبی نے مجھ سے فرمایا کہ تمہاری حضرت حسن بصری کے بارے میں کیا رائے ہے جب وہ فرماتے ہیں کہ ”رسول اللہ صلی اللہ علیہ وآلہ وسلم نے ارشاد فرمایا!“ حالانکہ میں حضرت ابن عمر رضی اللہ عنہما کی مجلس میں بیٹھا ہوں میں نے انہیں کبھی نبی کریم صلی اللہ علیہ وآلہ وسلم کی کوئی حدیث بیان کرتے ہوئے نہیں سنا، سوائے ایک حدیث کے جو آپ نے بیان فرمائی کہ: نبی کریم صلی اللہ علیہ وآلہ وسلم کے پاس گوہ لائی گئی تو نبی کریم صلی اللہ علیہ وآلہ وسلم نے ارشاد فرمایا: بیشک یہ میرا کھانا نہیں ہے، رہے تم تو تم اسے کھالو۔ [مصنف ابن ابي شيبه/ كتاب الأدب/حدیث: 27910]

حضرت عبد اللہ بن ابو السفر فرماتے ہیں کہ امام شعبی نے ارشاد فرمایا کہ میں ایک سال تک حضرت ابن عمر رضی اللہ عنہما کی مجلس میں بیٹھا، میں نے انہیں نبی کریم صلی اللہ علیہ وآلہ وسلم کی کوئی حدیث بیان کرتے ہوئے نہیں سنا۔ [مصنف ابن ابي شيبه/ كتاب الأدب/حدیث: 27911]

حضرت ابراہیم فرماتے ہیں کہ حضرت عمر بن خطاب حضرت ابن مسعود، حضرت ابو الدرداء اور حضرت ابو مسعو، عقبہ بن عمرو سے احادیث کے بارے میں سوال کیا کرتے تھے۔ آپ نے اپنی شہادت تک ان حضرات کو مدینے میں ہی رکھا تھا۔ [مصنف ابن ابي شيبه/ كتاب الأدب/حدیث: 27912]