حضرت سھل بن سعد فرماتے ہیں کہ کسی شخص نے نبی کریم صلی اللہ علیہ وآلہ وسلم کے حجرے میں سوراخ سے جھانکا، اس حال میں کہ آپ صلی اللہ علیہ وآلہ وسلم کے پاس کنگھی تھی جس سے آپ صلی اللہ علیہ وآلہ وسلم اپنا سر کھجلا رہے تھے۔ آپ صلی اللہ علیہ وآلہ وسلم نے فرمایا: اگر مجھے معلوم ہوتا کہ تو دیکھ رہا ہے تو میں یہ کنگھی تیر آنکھ میں مار دیتا۔ اس لیے کہ اجازت تو آنکھ کی وجہ سے ہی مانگی جاتی ہے۔ [مصنف ابن ابي شيبه/ كتاب الأدب/حدیث: 27913]

حضرت ابو سوید عبدی فرماتے ہیں کہ ہم لوگ حضرت ابن عمر رضی اللہ عنہما کے دروازے پر ان سے اجازت طلب کر رہے تھے کہ میری نگاہ پڑگئی اور انہوں نے مجھے دیکھ لیا اور فرمایا تم میں سے کس نے میرے گھر میں جھانکا؟ میں نے عرض کیا: میں نے … اللہ آپ کو درست رکھے …کہ اچانک میری نظر پڑگئی تو میں نے دیکھ لیا۔ آپ نے فرمایا: ہلاکت ہو! تو نے کیوں میرے گھر میں جھانکا؟! [مصنف ابن ابي شيبه/ كتاب الأدب/حدیث: 27914]

حضرت ھذیل بن شرحبیل فرماتے ہیں کہ حضرت سعد نے اپنا سر داخل کر کے نبی کریم صلی اللہ علیہ وآلہ وسلم سے اجازت مانگی۔ اس پر نبی کریم صلی اللہ علیہ وآلہ وسلم نے ارشاد فرمایا: بیشک اجازت طلب کرنا تو نظر کی وجہ سے مقرر کیا گیا ہے۔ [مصنف ابن ابي شيبه/ كتاب الأدب/حدیث: 27915]

حضرت حسن سے روایت ہے کہ حضور صلی اللہ علیہ وآلہ وسلم نے فرمایا: جس نے پہلے ہی گھر میں جھانک کر دیکھ لیا تو گویا کہ وہ داخل ہوگیا۔ [مصنف ابن ابي شيبه/ كتاب الأدب/حدیث: 27916]

حضرت ھزیل فرماتے ہیں کہ ایک آدمی آیا اور نبی کریم صلی اللہ علیہ وآلہ وسلم کے دروازے پر کھڑے ہو کر اجازت طلب کرنے لگا۔ وہ بالکل دروازے پر کھڑا ہوا تھا اس پر نبی کریم صلی اللہ علیہ وآلہ وسلم نے ارشاد فرمایا: یہاں سے یہاں آ جاؤ۔ اس لیے کہ اجازت تو آنکھ کی وجہ سے مانگی جاتی ہے۔ [مصنف ابن ابي شيبه/ كتاب الأدب/حدیث: 27917]

حضرت ابوہریرہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: اگر کوئی شخص بغیر اجازت کے کچھ لوگوں پر جھانکے تو ان کے لیے حلال ہے کہ وہ اس کی آنکھ پھوڑ دیں۔ [مصنف ابن ابي شيبه/ كتاب الأدب/حدیث: 27918]

حضرت انس بن مالک رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم گھر میں تھے کہ کسی آدمی نے دروازے کے شگاف سے جھانکا۔ نبی کریم صلی اللہ علیہ وآلہ وسلم نے اس پر نیزے کا پھل پھینک دیا تو وہ آدمی پیچھے ہٹ گیا۔ [مصنف ابن ابي شيبه/ كتاب الأدب/حدیث: 27919]

حضرت مسلم بن نذیر فرماتے ہیں کہ کسی آدمی نے حضرت حذیفہ رضی اللہ عنہ سے اپنا سر داخل کر کے اجازت مانگی۔ اس پر حضرت حذیفہ رضی اللہ عنہ نے اس سے فرمایا: تو نے اپنا سر داخل کر ہی لیا ہے تو اپنی سرین بھی داخل کرلے!! [مصنف ابن ابي شيبه/ كتاب الأدب/حدیث: 27920]