حضرت شریک بن غلہ فرماتے ہیں کہ میں حضرت عمر بن خطاب کے پاس تھا تو آپ مجھے کہتے تھے: اے میرے بھتیجے! پھر انہوں نے مجھ سے پوچھا: تو میں نے ان کو اپنا نسب بیان کیا۔ انہوں نے جان لیا کہ میرے والد نے اسلام قبول نہیں کیا۔ پھر آپ نے یوں کہنا شروع کردیا: اے میرے بیٹے اے میرے بیٹے۔ [مصنف ابن ابي شيبه/ كتاب الأدب/حدیث: 28253]

حضرت قیس فرماتے ہیں کہ حضر ت مغیرہ بن شعبہ نے ارشاد فرمایا: کسی نے بھی رسول اللہ صلی اللہ علیہ وآلہ وسلم سے دجال کے بارے میں اتنا نہیں پوچھا جتنا میں نے آپ صلی اللہ علیہ وآلہ وسلم سے اس کے بارے میں پوچھا آپ صلی اللہ علیہ وآلہ وسلم نے فرمایا: اے میرے بیٹے! تجھے اس سے کوئی مصیبت نہیں پہنچے گی۔ [مصنف ابن ابي شيبه/ كتاب الأدب/حدیث: 28254]

حضرت عمر بن ابی سلمہ فرماتے ہیں کہ نبی کریم صلی اللہ علیہ وآلہ وسلم کے پاس کھانا لایا گیا تو آپ صلی اللہ علیہ وآلہ وسلم نے فرمایا: اے عمر، اے میرے بیٹے! اللہ کا نام لو اور دائیں ہاتھ سے کھانا کھاؤ اور اپنے سامنے سے کھاؤ۔ [مصنف ابن ابي شيبه/ كتاب الأدب/حدیث: 28255]

حضرت انس رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: اے میرے بیٹے۔ [مصنف ابن ابي شيبه/ كتاب الأدب/حدیث: 28256]

حضرت مکحول ازدی فرماتے ہیں کہ حضرت ابن عمر رضی اللہ عنہما سے اس آدمی کے متعلق پوچھا گیا جس کو سمر قند یا خراسان یا کوفہ سے روک دیا گیا تھا، آپ نے فرمایا: اے میرے بیٹے! کاش ہم نے بھی وقت سے چھٹکارا پا لیا ہوتا۔ [مصنف ابن ابي شيبه/ كتاب الأدب/حدیث: 28257]

حضرت قیس بن عباد فرماتے ہیں کہ حضرت ابی بن کعب نے ان سے ارشاد فرمایا: اے میرے بیٹے! اللہ تمہارا برا نہ کرے۔ [مصنف ابن ابي شيبه/ كتاب الأدب/حدیث: 28258]

حضرت قابوس کے والد فرماتے ہیں کہ حضرت علی رضی اللہ عنہ نے کہا: اے میرے بیٹے۔ [مصنف ابن ابي شيبه/ كتاب الأدب/حدیث: 28259]

حضرت نعیم فرماتے ہیں کہ میں نے حضرت عاصم سے اللہ رب العزت کے قول { فَنَادَاہَا مِنْ تَحْتِہَا } کے متعلق پوچھا: تو آپ نے فرمایا: { مِنْ تَحْتَہَا } ہے فتح کے ساتھ۔ میں نے پوچھا: آپ نے کس سے روایت کی؟ انہوں نے فرمایا: اے میرے بیٹے! حضرت زر سے! [مصنف ابن ابي شيبه/ كتاب الأدب/حدیث: 28260]

حضرت زبرقان فرماتے ہیں کہ حضرت ابو وائل نے مجھ سے فرمایا: اے میرے لاڈلے بیٹے! [مصنف ابن ابي شيبه/ كتاب الأدب/حدیث: 28261]