عکرمہ حضرت ابن عباس رضی اللہ عنہما سے روایت کرتے ہیں فرمایا { لَمْ نَجْعَلْ لَہُ مِنْ قَبْلُ سَمِیًّا } کی تفسیر یہ ہے کہ آپ سے پہلے کسی کا نام یحییٰ نہیں رکھا۔ [مصنف ابن ابي شيبه/كتاب الفضائل/حدیث: 34068]

مجاہد سے بھی اس جیسی روایت منقول ہے۔ [مصنف ابن ابي شيبه/كتاب الفضائل/حدیث: 34069]

مہدی عکرمہ سے { وَآتَیْنَاہُ الْحُکْمَ صَبِیًّا } کا معنی نقل کرتے ہیں کہ اس سے مراد عقل ہے۔ [مصنف ابن ابي شيبه/كتاب الفضائل/حدیث: 34070]

مجاہد { وَآتَیْنَاہُ الْحُکْمَ صَبِیًّا } کا معنی نقل کرتے ہیں کہ اس سے مراد قرآن ہے۔ [مصنف ابن ابي شيبه/كتاب الفضائل/حدیث: 34071]

منصور بن صفیہ اپنی والدہ سے روایت کرتے ہیں فرمایا کہ حضرت ابن عمر رضی اللہ عنہما مسجد میں داخل ہوئے جب کہ ابن زبیر رضی اللہ عنہ کو سولی پر لٹکایا ہوا تھا، لوگ کہنے لگے کہ یہ حضرت اسماء تشریف فرما ہیں، آپ ان کے پاس گئے، ان کو وعظ و نصیحت کی اور فرمایا کہ جسم کوئی چیز نہیں بلکہ اللہ کے پاس تو روحیں پہنچتی ہیں، اس لیے تم صبر کرو اور ثواب کی امید رکھو، انہوں نے فرمایا کہ مجھے صبر سے کیا چیز روکے گی جبکہ یحییٰ بن زکریا علیہ السلام کا سر بنی اسرائیل کی زانیہ کو دیا گیا تھا؟ [مصنف ابن ابي شيبه/كتاب الفضائل/حدیث: 34072]

حضرت عروہ فرماتے ہیں کہ حضرت یحییٰ بن زکریا علیہ السلام کو ایک زانیہ عورت کی خاطر قتل کیا گیا تھا جس نے اپنے ساتھی سے کہا تھا کہ میں تجھ سے اس وقت تک راضی نہ ہوں گی جب تک تو میرے پاس ان کا سر نہ لائے، کہتے ہیں کہ اس نے ان کو ذبح کیا اور ایک طشت میں اس کے پاس ان کا سر لے آیا۔ [مصنف ابن ابي شيبه/كتاب الفضائل/حدیث: 34073]

مجاہد سے { لَمْ نَجْعَلْ لَہُ مِنْ قَبْلُ سَمِیًّا } کی تفسیر میں منقول ہے کہ اس سے مراد ان جیسی فضیلت ہے۔ [مصنف ابن ابي شيبه/كتاب الفضائل/حدیث: 34074]

سعید بن مسیب حضرت عبد اللہ بن عمرو رضی اللہ عنہ سے روایت کرتے ہیں فرمایا کہ ہر شخص نے یا تو غلطی کی یا غلطی کا ارادہ کیا سوائے یحییٰ بن زکریا علیہ السلام کے، پھر آپ نے پڑھا { وَسَیِّدًا وَحَصُورًا } پھر زمین سے ایک چیز اٹھائی اور فرمایا کہ ان کے پاس اس سے بڑھ کر کچھ نہیں تھا۔ [مصنف ابن ابي شيبه/كتاب الفضائل/حدیث: 34075]

حضرت سعید سے { وَسَیِّدًا وَحَصُورًا } کا معنی منقول ہے، ”بردبار“۔ [مصنف ابن ابي شيبه/كتاب الفضائل/حدیث: 34076]

حضرت ابن عباس رضی اللہ عنہما نبی 5 سے روایت کرتے ہیں فرمایا کہ ہر شخص نے یا توغلطی کی یا غلطی کا ارادہ کیا، سوائے یحییٰ بن زکریا علیہ السلام کے۔ [مصنف ابن ابي شيبه/كتاب الفضائل/حدیث: 34077]