حضرت مجاہد رحمہ اللہ سے مروی ہے کہ قرآن کریم کی آیت { مَوْضُونَۃٍ } کا مطلب ہے کہ ان کو بنایا ہوگا سونے کی تاروں کے ساتھ۔ [مصنف ابن ابي شيبه/كتاب الجنة/حدیث: 36788]

حضرت مغیث سے مروی ہے کہ جنت میں پرندہ آئے گا اور درخت پر یا دستر خوان پر بیٹھے گا پس وہ جنتی اس کے ایک پہلو سے شوربے والا گوشت کھائے گا اور دوسرے پہلو سے بھنا ہوا۔ [مصنف ابن ابي شيبه/كتاب الجنة/حدیث: 36790]

حضرت ابو امامہ قرآن کریم کی آیت (وَفُرُشٍ مَرْفُوعَۃٍ) کی تفسیر میں فرماتے ہیں کہ اگر اس کے اوپر سے ایک بچھونا اس کی تہہ کی طرف گرے تو وہ اتنے اتنے خریف (موسم/ عرصہ) بعد تہہ تک پہنچے گا۔ [مصنف ابن ابي شيبه/كتاب الجنة/حدیث: 36791]

حضرت براء { قُطُوفُہَا دَانِیَۃٌ} کے متعلق فرماتے ہیں کہ جنتی آدمی اپنی جگہ کھڑے کھڑے پھل تناول کرے گا۔ [مصنف ابن ابي شيبه/كتاب الجنة/حدیث: 36792]

حضرت براء { دَانِیَۃٌ} کے متعلق فرماتے ہیں کہ پھل ان کے قریب کردیئے جائیں گے۔ [مصنف ابن ابي شيبه/كتاب الجنة/حدیث: 36793]

حضرت براء { وَذُلِّلَتْ قُطُوفُہَا تَذْلِیلاً } کے متعلق فرماتے ہیں کہ وہ اس کے پھل جہاں سے چاہیں گے توڑ لیں گے۔ [مصنف ابن ابي شيبه/كتاب الجنة/حدیث: 36794]

حضرت مجاہد فرماتے ہیں کہ العبقری سے مراد موٹا ریشم ہے۔ [مصنف ابن ابي شيبه/كتاب الجنة/حدیث: 36795]

حضرت عبد اللہ بن حارث رضی اللہ عنہ فرماتے ہیں کہ جب اللہ رب العزت نے جنت عدن کو پیدا فرمایا تو اس سے فرمایا میرے ساتھ کلام کر جنت بولی مومنین کامیاب ہوگئے۔ [مصنف ابن ابي شيبه/كتاب الجنة/حدیث: 36796]

حضرت مجاہد فرماتے ہیں کہ قرآن کریم کی آیت { عَلَی الأَرَائِکِ مُتَّکِئُونَ } سے مراد ہے کہ مسہریوں پر ہوں گے جن پر پازیب ہوں گے۔ [مصنف ابن ابي شيبه/كتاب الجنة/حدیث: 36797]