حضرت مجاہد رحمہ اللہ کا ارشاد ہے کہ سمجھ والا شخص وہ ہے جو اللہ سے ڈرے۔ [مصنف ابن ابي شيبه/كتاب الزهد/حدیث: 38190]

حضرت مجاہد سے قرآن پاک کی آیت { تُوبُوا إِلَی اللہِ تَوْبَۃً نَصُوحًا } کی تفسیر منقول ہے کہ وہ آدمی توبہ کرے اور پھر دوبارہ گناہ نہ کرے۔ [مصنف ابن ابي شيبه/كتاب الزهد/حدیث: 38191]

حضرت مجاہد سے اللہ تعالیٰ کے ارشاد { وَلَہُ أَسْلَمَ مَنْ فِی السَّمَاوَاتِ وَالأَرْضِ طَوْعًا وَکَرْہًا } کے بارے میں منقول ہے کہ اس سے مراد تابع دار، مومن شخص ہے۔ [مصنف ابن ابي شيبه/كتاب الزهد/حدیث: 38192]

حضرت مجاہد سے اللہ تعالیٰ کے ارشاد { کَانُوا قَلِیلاً مِنَ اللَّیْلِ مَا یَہْجَعُونَ } کے بارے میں منقول ہے کہ وہ لوگ تمام رات نہیں سوتے تھے۔ [مصنف ابن ابي شيبه/كتاب الزهد/حدیث: 38193]

حضرت مجاہد سے اللہ تعالیٰ کے ارشاد { حُورٌ مَقْصُورَاتٌ فِی الْخِیَامِ } کی تفسیر میں منقول ہے کہ وہ ایسی حوریں ہوں گی کہ جو موتیوں کے خیموں میں ہوں گی اور ان کے دل وجان اور آنکھیں صرف اپنے خاوندوں پر منحصر ہوں گی۔ وہ ان کے علاوہ کسی اور سے محبت نہیں کریں گی۔ [مصنف ابن ابي شيبه/كتاب الزهد/حدیث: 38194]

حضرت مجاہد سے اللہ تعالیٰ کے ارشاد { وَحُورٌ عِینٌ} کے بارے میں منقول ہے کہ ان حوروں کے دیکھنے میں آنکھیں چندھیا رہی ہوں گی۔ [مصنف ابن ابي شيبه/كتاب الزهد/حدیث: 38195]

حضرت مجاہد سے اللہ تعالیٰ کے ارشاد { وَاسْأَلُوا اللَّہَ مِنْ فَضْلِہِ } کے بارے میں منقول ہے کہ اس سے دنیا کا مال مراد نہیں ہے۔ [مصنف ابن ابي شيبه/كتاب الزهد/حدیث: 38196]

حضرت مجاہد سے اللہ تعالیٰ کے ارشاد { وَتَبَتَّلْ إلَیْہِ تَبْتِیلاً } کی تفسیر میں منقول ہے کہ اللہ کے لیے اخلاص پیدا کرو۔ [مصنف ابن ابي شيبه/كتاب الزهد/حدیث: 38197]

حضرت مجاہد سے ارشاد منقول ہے کہ جب بھی کوئی مرتا ہے تو زمین چالیس دن اس پر روتی ہے۔ [مصنف ابن ابي شيبه/كتاب الزهد/حدیث: 38198]

حضرت مجاہد سے اللہ کے ارشاد { وَلِمَنْ خَافَ مَقَامَ رَبِّہِ جَنَّتَانِ } کی تفسیر میں منقول ہے کہ اس سے مراد وہ شخص ہے کہ جو بوقت گناہ اللہ کو یاد کرے اور گناہ سے احتراز کرلے۔ [مصنف ابن ابي شيبه/كتاب الزهد/حدیث: 38199]