سیدنا عبداللہ بن عباس رضی اللہ عنہما نے اللہ تعالیٰ کے اس فرمان کے بارے میں بیان کیا: ”اور وہ لوگ جو اس کی طاقت نہیں رکھتے، ان کا فدیہ ایک مسکین کو کھانا کھلانا ہے۔“ اس سے مراد ایک مسکین ہے۔ ارشاد باری تعالیٰ ہے: ”تو جو شخص بھلائی نفلی طور پر کرے۔“ سیدنا عبداللہ بن عباس رضی اللہ عنہما فرماتے ہیں: یعنی جو ایک اور مسکین کو بھی کھانا کھلا دے، تو یہ زیادہ بہتر ہے۔ وہ فرماتے ہیں: یہ حکم منسوخ نہیں ہے، البتہ یہ رخصت اس بوڑھے آدمی کو دی گئی ہے جو روزہ رکھنے کی استطاعت نہیں رکھتا۔ اور کھانا کھلانے کا یہ حکم اس شخص کے لیے ہے جو یہ جانتا ہے کہ اب وہ کبھی بھی روزہ رکھنے کی طاقت نہیں رکھے گا۔ اس کی سند صحیح ہے اور ثابت ہے۔ [سنن الدارقطني/ كِتَابُ الصِّيَامِ/حدیث: 2377]

سیدنا عبداللہ بن عباس رضی اللہ عنہما فرماتے ہیں: (ارشاد باری تعالیٰ ہے) ”جو لوگ اس کی طاقت نہیں رکھتے، ان کا فدیہ ایک مسکین کو کھانا کھلانا ہے۔“ سیدنا عبداللہ بن عباس رضی اللہ عنہما فرماتے ہیں: جو لوگ اس کی طاقت نہیں رکھتے، وہ اس بات کے پابند ہیں کہ وہ ایک مسکین کو کھانا کھلائیں، اور جو شخص نفلی طور پر بھلائی کرنا چاہے، تو وہ مزید ایک مسکین کو کھانا کھلا دے۔ یہ حکم منسوخ نہیں ہے، بلکہ یہ اس کے لیے زیادہ بہتر ہے۔ اور اگر تم روزہ رکھ لو، تو یہ زیادہ بہتر ہے۔ تو اس معاملے میں رخصت صرف اس بوڑھے آدمی کو دی گئی ہے جو روزہ رکھنے کی طاقت نہیں رکھتا اور اس مریض کو دی گئی ہے جو یہ جانتا ہے کہ وہ اب کبھی بھی شفا یاب نہیں ہو گا۔ اس کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2378]

سیدنا عبداللہ بن عباس رضی اللہ عنہما فرماتے ہیں: (ارشاد باری تعالیٰ ہے) ”جو لوگ اس کی طاقت نہیں رکھتے، ان کا فدیہ ایک مسکین کو کھانا کھلانا ہے۔“ یعنی ایک مسکین کو کھانا کھلانا ہے۔ (ارشاد باری تعالیٰ ہے) ”جو شخص نفلی طور پر بھلائی کرنا چاہے۔“ اس کا مطلب ہے کہ وہ مزید ایک مسکین کو کھانا کھلا دے۔ (ارشاد باری تعالیٰ ہے) ”تو یہ اس کے لیے زیادہ بہتر ہو گا۔ اور اگر تم لوگ روزہ رکھ لو، یہ تمہارے لیے زیادہ بہتر ہے۔“ (سیدنا ابن عباس رضی اللہ عنہما بیان کرتے ہیں) یہ رخصت صرف اس بوڑھے آدمی کو دی گئی ہے جو روزہ رکھنے کی طاقت نہ رکھے یا اس بیمار کو دی گئی ہے جو یہ جانتا ہے کہ اب وہ کبھی شفا یاب نہیں ہو گا۔ اس کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2379]

سیدنا عبداللہ بن عباس رضی اللہ عنہما فرماتے ہیں: ”یہ رخصت اس بوڑھے آدمی کے لیے ہے کہ وہ روزہ رکھنا چھوڑ دے اور ایک دن کے عوض ایک مسکین کو کھانا کھلائے اور اس پر قضاء لازم نہیں ہو گی۔“ اس کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2380]

عطاء رحمہ اللہ بیان کرتے ہیں: انہوں نے سیدنا عبداللہ بن عباس رضی اللہ عنہما کو یہ تلاوت کرتے ہوئے سنا: ”اور وہ لوگ جو اس کی طاقت نہیں رکھتے، تو ان کا فدیہ ایک مسکین کو کھانا کھلانا ہے۔“ سیدنا عبداللہ بن عباس رضی اللہ عنہما فرماتے ہیں: یہ حکم منسوخ نہیں ہے۔ اس سے مراد وہ بوڑھا آدمی یا وہ عورت ہے جو کبھی روزہ رکھنے کی استطاعت نہیں رکھیں گے، تو وہ ہر ایک دن کے عوض ایک مسکین کو کھانا کھلا دیں۔ یہ روایت صحیح ہے۔ [سنن الدارقطني/ كِتَابُ الصِّيَامِ/حدیث: 2381]

سعید بن جبیر بیان کرتے ہیں: سیدنا عبداللہ بن عباس رضی اللہ عنہ نے اپنی ام ولد سے، جو حاملہ تھی اور بچے کو دودھ پلاتی تھی، (یہ کہا تھا): ”تم ان لوگوں میں شامل ہو، جو روزہ رکھنے کی طاقت نہیں رکھتے، تم پر فدیہ لازم ہے، قضاء لازم نہیں ہو گی۔“ اس کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2382]

سعید بن جبیر، سیدنا عبداللہ بن عباس رضی اللہ عنہما کے بارے میں یہ بات بیان کرتے ہیں: انہوں نے یہ بات ارشاد فرمائی ہے: ”سل کا ایسا مریض، جو اس بات سے مایوس ہو چکا ہو کہ وہ ٹھیک ہو گا اور وہ کبھی روزہ نہ رکھ سکتا ہو، ایسا شخص روزہ نہیں رکھے گا اور ہر ایک دن کے عوض ایک مسکین کو کھانا کھلا دے گا۔“ اس روایت کا راوی حجاج ضعیف ہے۔ [سنن الدارقطني/ كِتَابُ الصِّيَامِ/حدیث: 2383]

سعید بن جبیر نے سیدنا عبداللہ بن عباس رضی اللہ عنہما کے بارے میں یہ بات نقل کی ہے: ان کی ایک کنیز تھی، جو بچے کو دودھ پلاتی تھی، وہ بیمار ہو گئی، تو سیدنا عبداللہ بن عباس رضی اللہ عنہما نے اس کو یہ ہدایت کی کہ: ”تم روزے نہ رکھو، اور (فدیہ کے طور پر) کھانا کھلا دو اور قضاء نہ رکھنا۔“ یہ روایت مستند ہے۔ [سنن الدارقطني/ كِتَابُ الصِّيَامِ/حدیث: 2384]

سعید بن جبیر بیان کرتے ہیں: سیدنا عبداللہ بن عباس رضی اللہ عنہما یا شاید سیدنا عبداللہ بن عمر رضی اللہ عنہما نے یہ بات بیان کی ہے: ”حاملہ یا دودھ پلانے والی عورت روزہ نہیں رکھے گی، وہ بعد میں اس کی قضاء بھی نہیں کرے گی (بلکہ مسکین کو کھانا کھلا دے گی)۔“ یہ روایت اور اس کے بعد والی روایت مستند ہے۔ [سنن الدارقطني/ كِتَابُ الصِّيَامِ/حدیث: 2385]

مجاہد رحمہ اللہ بیان کرتے ہیں: سیدنا عبداللہ بن عباس رضی اللہ عنہما نے یہ آیت تلاوت کی: ”جو لوگ اس کی طاقت نہیں رکھتے، ان پر اس کا فدیہ ایک مسکین کو کھانا کھلانا فدیہ کے طور پر واجب ہے۔“ سیدنا عبداللہ بن عباس رضی اللہ عنہما فرماتے ہیں: اس سے مراد وہ بوڑھا آدمی ہے جو روزہ رکھنے کی استطاعت نہیں رکھے گا۔ وہ روزہ چھوڑ دے گا اور ہر دن کے عوض ایک مسکین کو کھانا کھلائے گا، جو گندم کا نصف صاع ہو گا۔ [سنن الدارقطني/ كِتَابُ الصِّيَامِ/حدیث: 2386]