سیدنا سلیم بن جابر ہجیمی رضی اللہ عنہ بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا۔ آپ صلی اللہ علیہ وسلم اس وقت اپنی چادر کو احتباء کے طور پر لپیٹ کر بیٹھے ہوئے تھے اور اس کا پلو آپ کے پاؤں پر تھا۔ میں نے عرض کی: یا رسول اللہ! آپ مجھے کچھ نصیحت کیجئے۔ نبی اکرم صلی اللہ علیہ وسلم نے فرمایا: تماللہ تعالیٰ کا تقوی اختیار کرو اور تم کسی بھی نیکی کو حقیر نہ سمجھو (خواہ وہ نیکی یہ ہو) کہ تم اپنے ڈول میں سے پانی مانگنے والے کے برتن میں انڈیل دو، یا اپنے بھائی کے ساتھ خندہ پیشانی سے مل لو اور تم تہبند لٹکانے سے بچو، کیونکہ یہ تکبر کی علامات میں سے ہے اوراللہ تعالیٰ اسے پسند نہیں کرتا اور اگر کوئی شخص تمہیں کسی ایسی خامی کے حوالے سے عار دلائے جس کے بارے میں اسے یہ علم ہو کہ یہ خامی تمہارے اندر موجود ہے، تو تم اسے کسی ایسی چیز کے حوالے سے عار نہ دلاؤ جس کے بارے میں تم یہ جانتے ہو کہ یہ چیز اس میں ہے، تو وہ جو کرتا ہے تم اسے کرنے دو، اس کا وبال اس کے ذمے ہو گا اور تمہیں تمہارا اجر مل جائے گا اور تم کسی کو برا ہرگز نہ کہنا۔“ راوی بیان کرتے ہیں: اس کے بعد میں نے کبھی کسی جانور یا انسان کو برا نہیں کہا:۔
امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم پراللہ تعالیٰ سے ڈرنا لازم ہے۔“ یہ ایک ایسا حکم ہے، جو تمام مخاطب لوگوں پر فرض ہے کہ وہ تمام حالتوں میںاللہ تعالیٰ سے ڈرتے رہیں، جبکہ اپنے ڈول میں سے پانی مانگنے والے شخص کے ڈول میں پانی انڈیل دینا یا اپنے مسلمان بھائی سے بات چیت کرتے وقت اسے خندہ پیشانی کے ساتھ ملنا ایسے فعل ہیں، جن کا حکم دینے کا مقصد استحباب ہے، اور مقصد ثواب کا حصول ہے۔ [صحیح ابن حبان/كِتَابُ البِرِّ وَالإِحْسَانِ/حدیث: 521]

سیدنا ابوجری ہجیمی رضی اللہ عنہ بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا۔ میں نے عرض کی: یا رسول اللہ! میں دیہات کا رہنے والا شخص ہوں۔ آپ ہمیں ایسی چیز کی تعلیم دیجئے جس کے ذریعےاللہ تعالیٰ ہمیں نفع دے۔ نبی اکرم صلی اللہ علیہ وسلم نے ارشاد فرمایا: تم کسی بھی نیکی کو حقیر ہرگز نہ سمجھنا، خواہ وہ نیکی یہ ہو کہ تم اپنے ڈول میں سے پانی مانگنے والے کے برتن میں پانی انڈیل دو۔ خواہ وہ نیکی یہ ہو کہ تم اپنے بھائی کے ساتھ خندہ پیشانی سے مل لو اور تم تہبند کو لٹکانے سے بچنا، کیونکہ یہ تکبر کی علامت ہے اوراللہ تعالیٰ اسے پسند نہیں کرتا اور اگر کوئی شخص کسی ایسی چیز کے حوالے سے تمہیں برا کہے، جس کے بارے میں وہ یہ جانتا ہے کہ یہ خامی تمہارے اندر ہے، تو تم ایسی چیز کے حوالے سے اس کو برا نہ کہنا جس کے بارے میں تم یہ جانتے ہو کہ یہ خامی اس کے اندر ہے۔ تمہارا اجر تمہیں مل جائے گا اور اس کا وبال اس شخص پر ہو گا، جس نے وہ بات کہی ہے۔“
(امام ابن حبان رحمہ اللہ فرماتے ہیں:) نیکی کو حقیر نہ سمجھنے کا حکم ہونا یہ ایک ایسا امر ہے، جس کے ذریعے رہنمائی کرنے کا ارادہ کیا گیا ہے، اور تہبند کو لٹکانے سے ممانعت کا حکم ایک لازمی حکم ہے، جو ایک متعین علت کی وجہ سے ہے، اور وہ تکبر کرنا ہے، تو جب تکبر کرنے کی علت معدوم ہو، تو تہبند کو لٹکانے میں کوئی حرج نہیں ہو گا۔ اور جب آدمی کو برا کہا: جائے، تو اس وقت برا کہنے سے ممانعت کا حکم ایسا ہے، جو اس وقت کے لئے بھی ہے اس سے پہلے کے لئے بھی ہے، اور اس کے بعد کے لئے بھی ہے، اگرچہ آدمی کو برا نہ کہا: گیا ہو۔ [صحیح ابن حبان/كِتَابُ البِرِّ وَالإِحْسَانِ/حدیث: 522]