جناب ایاس بن ابی رملہ شامی سے روایت ہے، کہتے ہیں کہ میں سیدنا معاویہ بن ابی سفیان رضی اللہ عنہ کے ہاں حاضر تھا اور وہ سیدنا زید بن ارقم رضی اللہ عنہ سے دریافت کر رہے تھے کہ کیا تمہارے ہوتے ہوئے رسول اللہ صلی اللہ علیہ وسلم کے دور میں کبھی دو عیدیں (جمعہ، عید) ایک ہی دن میں اکٹھی ہوئی تھیں؟ انہوں نے کہا: ”ہاں!“ پوچھا کہ تب آپ نے کیسے کیا؟ انہوں نے کہا کہ نبی اللہ صلی اللہ علیہ وسلم نے عید کی نماز پڑھی پھر جمعہ کے بارے میں رخصت دے دی اور فرمایا: ”جو پڑھنا چاہے پڑھ لے۔“ [سنن ابي داود/تفرح أبواب الجمعة /حدیث: 1070]

عطا بن ابی رباح رحمہ اللہ بیان کرتے ہیں کہ حضرت عبداللہ بن زبیر رضی اللہ عنہ نے ہمیں جمعہ کے روز عید کے دن، دن کے پہلے حصے میں نماز پڑھائی، پھر ہم جمعہ کے لیے گئے مگر وہ نہ آئے اور ہم نے اکیلے ہی نماز پڑھی۔ اور حضرت عبداللہ بن عباس رضی اللہ عنہما طائف میں تھے، وہ جب آئے تو ہم نے ان سے اس کا ذکر کیا تو انہوں نے فرمایا کہ ”انہوں نے سنت پر عمل کیا ہے۔“ [سنن ابي داود/تفرح أبواب الجمعة /حدیث: 1071]

عطاء بن ابی رباح رحمہ اللہ نے بیان کیا کہ سیدنا ابن زبیر رضی اللہ عنہما کے دورِ خلافت میں جمعہ اور عیدِ فطر ایک ہی دن آگئے تو انہوں نے کہا: ”دو عیدیں ایک ہی دن میں اکٹھی ہو گئی ہیں۔“ پھر انہوں نے ان دونوں کو جمع کر دیا اور پہلے پہر دو رکعتیں پڑھائیں، اس پر کچھ اضافہ نہ کیا، حتیٰ کہ عصر پڑھی۔ [سنن ابي داود/تفرح أبواب الجمعة /حدیث: 1072]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”تمہارے اس دن میں دو عیدیں جمع ہو گئی ہیں، تو جو چاہے اس کے لیے یہ (نماز عید) جمعہ کے بدلے کافی ہے اور ہم جمعہ پڑھیں گے۔“ عمر بن حفص کی سند میں عنعنہ ہے (یعنی اس نے ”عن شعبہ“ کہا ہے)۔ [سنن ابي داود/تفرح أبواب الجمعة /حدیث: 1073]