اور حسن بن عبید اللہ کی حدیث کو ابوبکر بن عیاش نے ان سے روایت کیا ہے؛ ان تمام راویوں نے «عن زاذان عن البراء عن النبى صلى الله عليه وسلم» کے الفاظ کہے ہیں۔
یہ تمام اسانید جن کا میں نے ذکر کیا ہے، شیخین کی شرط پر صحیح ہیں۔ [المستدرك على الصحيحين/كِتَابُ الْإِيمَانِ/حدیث: 118]

سیدنا انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم اور سیدنا بلال رضی اللہ عنہ بقیع (قبرستان) میں چل رہے تھے، تو رسول اللہ صلی اللہ علیہ وسلم نے فرمایا: «يا بلالُ، هل تسمعُ ما أسمعُ؟» ”اے بلال! کیا تم وہ سن رہے ہو جو میں سن رہا ہوں؟“ انہوں نے عرض کیا: نہیں اللہ کی قسم اے اللہ کے رسول! میں نہیں سن رہا، آپ صلی اللہ علیہ وسلم نے فرمایا: «ألَا تسمعُ أهلَ القبور يُعذَّبون» ”کیا تم قبر والوں کو نہیں سن رہے جنہیں عذاب دیا جا رہا ہے؟“
یہ حدیث شیخین کی شرط پر صحیح ہے، تاہم انہوں نے ان الفاظ کے ساتھ اس کی تخریج نہیں کی، انہوں نے صرف «شعبه عن قتاده عن انس» کی حدیث پر اتفاق کیا ہے جس میں نبی صلی اللہ علیہ وسلم نے فرمایا: ”اگر مجھے یہ اندیشہ نہ ہوتا کہ تم (ڈر کے مارے) اپنے مردوں کو دفنانا چھوڑ دو گے، تو میں اللہ سے دعا کرتا کہ وہ تمہیں عذابِ قبر سنا دے۔“ [المستدرك على الصحيحين/كِتَابُ الْإِيمَانِ/حدیث: 119]