سیدنا ابن عمر رضی اللہ عنہما فرماتے ہیں کہ جب وہ مکہ میں ہوتے ہیں (اور جمعہ پڑھنے کے لیے آتے ہیں) اور جمعہ پڑھ تے ہیں تو دو رکعتیں پڑھتے ہیں پھر آگے بڑھتے ہیں اور چار رکعتیں پڑھتے ہیں اور جب آپ مدینہ میں ہوتے ہیں تو صرف جمعہ پڑھ کر گھر لوٹ جاتے ہیں اور گھر آ کر دو رکعتیں پڑھتے ہیں اور مسجد میں (جمعہ کے بعد) نماز نہیں پڑھتے، آپ سے کہا گیا (کہ آپ ایسا کیوں کرتے ہیں؟ تو انہوں نے جواباً) کہا: رسول اللہ صلی اللہ علیہ وسلم ایسے ہی کیا کرتے تھے۔ ٭٭ یہ حدیث امام بخاری و امام مسلم رحمۃ اللہ علیہما دونوں کے معیار کے مطابق صحیح ہے لیکن دونوں نے ہی اسے ان لفظ نقل نہیں کیا۔ امام بخاری رحمۃ اللہ علیہ اور امام مسلم رحمۃ اللہ علیہ ابن عمر رضی اللہ عنہ کی گھر میں دو رکعتیں پڑھنے کے متعلق حدیث نقل کی ہے جبکہ امام مسلم رحمۃ اللہ علیہ نے یہ حدیث نقل کی ہے کہ آپ صلی اللہ علیہ وسلم چار رکعتیں پڑھا کرتے تھے۔ ابن جریج کی متابعت: اس حدیث کو عطاء سے روایت کرنے میں ابن جریج نے یزید بن ابوحبیب کی متابعت کی ہے (ابن جریج کی روایت درج ذیل ہے) [المستدرك على الصحيحين/كِتَابُ الْجُمُعَةِ/حدیث: 1084]

سیدنا عطاء فرماتے ہیں: کہ انہوں نے ابن عمر رضی اللہ عنہما کو جمعہ کے دن (نماز) جمعہ پڑھتے دیکھا کہ وہ (نماز جمعہ پڑھنے کے بعد) اس جگہ سے جہاں آپ نے جمعہ پڑھا تھا تھوڑا سا آگے ہوئے اور دو رکعتیں پڑھیں پھر تھوڑا سا آگے ہوئے اور چار رکعتیں پڑھیں (ابن جریج کہتے ہیں) میں نے عطاء سے پوچھا: تم نے ابن عمر رضی اللہ عنہما کو کتنی مرتبہ ایسے کرتے دیکھا۔ انہوں نے جواب دیا: کئی مرتبہ۔ [المستدرك على الصحيحين/كِتَابُ الْجُمُعَةِ/حدیث: 1085]

سیدنا ابوذر فرماتے ہیں کہ نبی اکرم صلی اللہ علیہ وسلم نے ارشاد فرمایا: جو شخص جمعہ کے دن بہت اچھا غسل کرے اور خوب طہارت حاصل کرے، اچھے کپڑے پہنے اور خوشبو یا گھر کا تیل جو بھی میسر ہو لگائے اور دو میں فرق نہ کرے تو اللہ تعالیٰ اس کے اگلے جمعہ تک کے گناہ معاف کر دیتا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كِتَابُ الْجُمُعَةِ/حدیث: 1086]

سیدنا ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جب کسی کو جمعہ کے دن ایک جگہ پر بیٹھے بیٹھے اونگھ آنے لگے تو اس کو چاہیے کہ جگہ بدل لے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كِتَابُ الْجُمُعَةِ/حدیث: 1087]

سیدنا زبیر بن عوام کہتے ہیں: ہم رسول اللہ صلی اللہ علیہ وسلم کے ساتھ جمعہ پڑھا کرتے تھے (جب ہم جمعہ سے فارغ ہو جاتے تو) سائے کی طرف ایک دوسرے سے آگے نکلتے تو اس وقت سایہ ایک یا دو قدم تک ہوتا۔ ٭٭ یہ حدیث صحیح الاسناد ہے لیکن امام بخاری اور امام مسلم نے اس کو نقل نہیں کیا اور امام بخاری رحمۃ اللہ علیہ نے اس حدیث کو ابوخلدہ کی سند کے ہمراہ سیدنا انس رضی اللہ عنہ سے روایت کیا ہے تاہم ان کے الفاظ یہ ہیں۔ [المستدرك على الصحيحين/كِتَابُ الْجُمُعَةِ/حدیث: 1088]