سیدنا سالم بن عبداللہ بن عمر رضی اللہ عنہما اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم کے پاس سے جب کوئی جنازہ گزرتا تو جب تک وہ گزرتا رہتا آپ کھڑے رہتے۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ اور ابن عمر رضی اللہ عنہما کی عامر بن ربیعہ سے روایت کی گئی حدیث کا متن یہ نہیں ہے۔ کیونکہ وہ متن جنازہ کے ہمراہ چلنے کے متعلق ہے اور یہ جنازہ کیلئے قیام کا ہے اور اس میں روایات کا بہت زیادہ اختلاف ہے۔ [المستدرك على الصحيحين/كِتَابُ الْجَنَائِزِ/حدیث: 1334]

سیدنا علاء بن عبدالرحمن رضی اللہ عنہ اپنے والد کا یہ بیان روایت کرتے ہیں: وہ ایک ایسے جنازے میں شریک ہوئے جس کی نماز مروان بن حکم نے پڑھائی تھی پھر سیدنا ابوہریرہ رضی اللہ عنہ مروان کے ہمراہ قبرستان میں آ کر بیٹھ گئے۔ ان کے پاس ابوسعید خدری آئے اور مروان سے کہنے لگے: اپنا ہاتھ مجھے دیجیے: مروان نے اپنا ہاتھ ابوسعید کے ہاتھ میں دیا، تو ابوسعید (ان کا ہاتھ پکڑ کر بولے) اٹھیے! تو مروان کھڑا ہو گیا۔ پھر مروان نے پوچھا: آپ نے مجھے کیوں اٹھایا ہے؟ تو سیدنا ابوسعید رضی اللہ عنہ بولے: جب رسول اللہ صلی اللہ علیہ وسلم کوئی جنازہ دیکھتے تو کھڑے ہو جاتے (اور) جب تک جنازہ گزر نہیں جاتا تھا (اس وقت تک آپ کھڑے رہتے تھے) مروان نے سیدنا ابوہریرہ رضی اللہ عنہ کو مخاطب کرتے ہوئے پوچھا: اے ابوہریرہ رضی اللہ عنہ کیا یہ سچ کہہ رہے ہیں؟ سیدنا ابوہریرہ رضی اللہ عنہ نے کہا: جی ہاں۔ مروان نے کہا: آپ نے مجھے کیوں نہیں بتایا؟ سیدنا ابوہریرہ رضی اللہ عنہ نے فرمایا: آپ میرے امام ہیں، آپ بیٹھے تو میں بھی بیٹھ گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اسے اس سند کے ہمراہ نقل نہیں کیا۔ [المستدرك على الصحيحين/كِتَابُ الْجَنَائِزِ/حدیث: 1335]

سیدنا عبداللہ بن عمرو بن عاص رضی اللہ عنہ فرماتے ہیں: ایک شخص نے رسول اللہ صلی اللہ علیہ وسلم سے پوچھا: یا رسول اللہ صلی اللہ علیہ وسلم اگر ہمارے قریب سے کفار کا جنازہ گزرے تو کیا ہمیں کھڑے ہونا چاہیے؟ آپ صلی اللہ علیہ وسلم نے فرمایا: ہاں۔ اس کے لیے بھی کھڑے ہوں، کیونکہ تمہارا کھڑا ہونا، اس کافر کی میت کے لیے نہیں بلکہ ان ملائکہ کے احترام کے لیے ہو گا جنہوں نے اس کی روح قبض کی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْجَنَائِزِ/حدیث: 1336]

سیدنا انس بن مالک رضی اللہ عنہ روایت کرتے ہیں کہ رسول اللہ صلی اللہ علیہ وسلم کے پاس سے ایک یہودی کا جنازہ گزرا تو آپ صلی اللہ علیہ وسلم کھڑے ہو گئے۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ! یہ تو یہودی کا جنازہ ہے۔ آپ صلی اللہ علیہ وسلم نے فرمایا: میں تو ملائکہ کے احترام میں کھڑا ہوا تھا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اسے ان لفظوں کے ہمراہ نقل نہیں کیا، تاہم امام بخاری رحمۃ اللہ علیہ اور امام مسلم رحمۃ اللہ علیہ نے عبیداللہ بن مقسم کی جابر سے یہودی کے جنازے کے لیے قیام کے متعلقہ روایت کردہ حدیث نقل کی ہے۔ [المستدرك على الصحيحين/كِتَابُ الْجَنَائِزِ/حدیث: 1337]

سیدنا ابوسعید خدری رضی اللہ عنہ فرماتے ہیں: ہم رسول اکرم صلی اللہ علیہ وسلم کے نمائندے ہوا کرتے تھے۔ چنانچہ جب کسی کا آخری وقت آتا تو ہم رسول اکرم صلی اللہ علیہ وسلم کو اطلاع کرتے تو حضور اکرم صلی اللہ علیہ وسلم تشریف لا کر اس کے لیے دعائے مغفرت فرماتے اور جب ہم لوگ وہاں پہنچتے تو رسول اللہ صلی اللہ علیہ وسلم اور جو لوگ آپ کے ہمراہ ہوتے وہ واپس آ رہے ہوتے تھے۔ کئی مرتبہ آپ صلی اللہ علیہ وسلم تدفین تک وہیں رکے رہتے اور کئی مرتبہ (آپ کو جانکنی کے انتظار میں) بہت دیر تک وہاں رکنا پڑتا، ہمیں رسول اکرم صلی اللہ علیہ وسلم کی اس مشقت کا بہت احساس ہوا، ہم نے آپس میں مشورہ کیا کہ ہمیں کسی کی روح قض ہونے سے پہلے رسول پاک صلی اللہ علیہ وسلم کو نہیں بلانا چاہیے، بلکہ جب روح قبض ہو جائے تب آپ کو بلایا جائے، اس میں آپ صلی اللہ علیہ وسلم کو مشقت نہیں ہو گی۔ اور انتظار بھی نہیں کرنا پڑے گا (اس کے بعد ہم نے یہی طریقہ اپنا لیا کہ) ہم کسی کے فوت ہو جانے کے بعد آپ صلی اللہ علیہ وسلم کو بلاتے تھے، تو آپ صلی اللہ علیہ وسلم تشریف لا کر نماز جنازہ پڑھا دیا کرتے تھے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كِتَابُ الْجَنَائِزِ/حدیث: 1338]

سیدنا سعید ابن ابی سعید رضی اللہ عنہ فرماتے ہیں: ابن عباس رضی اللہ عنہما نے ایک جنازہ پڑھایا، اس میں بلند آواز سے سورہ فاتحہ پڑھی۔ پھر (جنازہ سے فارغ ہو کر) فرمایا: میں نے بلند آواز سے سورہ فاتحہ اس لیے پڑھی ہے تاکہ تمہیں پتہ چل جائے کہ یہ ” سنت “ ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ اور اس بات پر اجماع ہے کہ صحابی کا قول سنت ہے، حدیث ہے مسند ہے۔ ٭٭ اس حدیث کی ایک سند صحیح کے ہمراہ مشاہد حدیث بھی موجود ہے جس کو امام بخاری رحمۃ اللہ علیہ نے نقل کیا ہے (شاہد حدیث درج ذیل ہے)۔ [المستدرك على الصحيحين/كِتَابُ الْجَنَائِزِ/حدیث: 1339]