سیدنا قاسم بن محمد رضی اللہ عنہ فرماتے ہیں: میں ام المومنین سیدہ عائشہ رضی اللہ عنہا کے پاس گیا اور ان سے کہا: اے ام المومنین! میرے لیے نبی اکرم صلی اللہ علیہ وسلم اور ان کے دونوں ساتھیوں کی قبر سے پردہ ہٹائیے، تو انہوں نے تینوں قبروں سے میرے لیے پردہ ہٹا دیا۔ وہ تینوں قبریں نہ تو بہت اونچی تھیں اور نہ ہی بہت نیچی تھیں، ان کے اردگرد سرخ رنگ کی کنکریاں بچھی ہوئی تھیں، میں نے دیکھا کہ رسول اللہ صلی اللہ علیہ وسلم اگلی جانب ہیں اور سیدنا ابوبکر رضی اللہ عنہ کا سر آپ صلی اللہ علیہ وسلم کے کندھوں کے برابر ہے اور سیدنا عمر رضی اللہ عنہ کا سر نبی اکرم صلی اللہ علیہ وسلم کے قدموں کے پاس ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْجَنَائِزِ/حدیث: 1384]