سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم رمضان کے آخری عشرے میں اعتکاف فرمایا کرتے تھے، ایک سال آپ صلی اللہ علیہ وسلم اعتکاف نہ فرما سکے، چنانچہ جب اگلا سال آیا تو آپ صلی اللہ علیہ وسلم نے بیس دن کا اعتکاف فرمایا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کی۔ [المستدرك على الصحيحين/كِتَابُ الصَّوْمِ/حدیث: 1618]

سیدنا ابی بن کعب رضی اللہ عنہ سے روایت ہے کہ نبی کریم صلی اللہ علیہ وسلم رمضان کے آخری عشرے میں اعتکاف فرمایا کرتے تھے، ایک سال آپ صلی اللہ علیہ وسلم نے سفر کیا تو اعتکاف نہ کر سکے، پھر اگلے سال آپ صلی اللہ علیہ وسلم نے بیس راتوں کا اعتکاف فرمایا۔ [المستدرك على الصحيحين/كِتَابُ الصَّوْمِ/حدیث: 1619]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”اعتکاف کرنے والے پر (صرف اعتکاف کی وجہ سے) روزہ رکھنا لازم نہیں ہے الا یہ کہ وہ اسے (منت مان کر) اپنے اوپر لازم کر لے۔“
اس حدیث کی اسناد امام مسلم کی شرط پر صحیح ہیں لیکن شیخین نے اسے روایت نہیں کیا۔ اگرچہ فقہائے کوفہ نے اس کے برعکس دو حدیثیں بیان کی ہیں جن کا میں ذکر کروں گا، لیکن وہ راویوں کی عدالت کے پیمانے پر اس روایت کا مقابلہ نہیں کر سکتیں۔ [المستدرك على الصحيحين/كِتَابُ الصَّوْمِ/حدیث: 1620]

سیدنا عبداللہ بن عمر رضی اللہ عنہما سے روایت ہے کہ سیدنا عمر رضی اللہ عنہ نے دورِ جاہلیت میں ایک دن کے اعتکاف کی منت مانی تھی، پھر انہوں نے نبی کریم صلی اللہ علیہ وسلم سے اس بارے میں دریافت کیا تو آپ صلی اللہ علیہ وسلم نے فرمایا: ”تم اپنا اعتکاف پورا کرو اور اس دن کا روزہ بھی رکھو۔“ [المستدرك على الصحيحين/كِتَابُ الصَّوْمِ/حدیث: 1621]

سیدہ عائشہ رضی اللہ عنہا سے روایت ہے کہ اللہ کے نبی صلی اللہ علیہ وسلم نے فرمایا: ”روزے کے بغیر اعتکاف (درست) نہیں ہے۔“
امام بخاری اور امام مسلم نے سفیان بن حسین اور عبداللہ بن بدیل سے احتجاج نہیں کیا۔ [المستدرك على الصحيحين/كِتَابُ الصَّوْمِ/حدیث: 1622]

سیدنا ابن عباس رضی اللہ عنہما نے اللہ تعالیٰ کے اس ارشاد: ﴿وَعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ﴾ ”اور وہ لوگ جو اس کی طاقت رکھتے ہوں (مگر روزہ نہ رکھیں) ان پر فدیہ ایک مسکین کا کھانا ہے“ [سورة البقرة: 184] کی تفسیر میں فرمایا: کہ جس نے اپنی خوشی سے نیکی میں اضافہ کیا ﴿فَمَنْ تَطَوَّعَ خَيْرًا﴾ تو اس نے ایک اور مسکین کو کھانا کھلا دیا ﴿فَهُوَ خَيْرٌ لَهُ﴾ ”تو یہ اس کے لیے بہتر ہے“، انہوں نے فرمایا کہ یہ آیت منسوخ نہیں ہے، بلکہ یہ اس بوڑھے شخص کے حق میں ہے جو روزے کی قدرت نہیں رکھتا، اسے یہ حکم دیا گیا کہ وہ فدیہ میں کھانا کھلائے جب وہ یہ جان لے کہ وہ روزے کی طاقت نہیں رکھتا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الصَّوْمِ/حدیث: 1623]

سیدنا ابن عباس رضی اللہ عنہما سے روایت ہے کہ انتہائی بوڑھے شخص کے لیے یہ رخصت دی گئی ہے کہ وہ روزہ نہ رکھے اور ہر دن کے بدلے ایک مسکین کو کھانا کھلا دے، اور اس پر روزے کی قضا لازم نہیں ہے۔
یہ حدیث امام بخاری کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الصَّوْمِ/حدیث: 1624]