سیدنا معاذ بن جبل رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس شخص کی زندگی کا آخری کلام ” لا الٰہ الّا اللّٰہ “ ہوا وہ جنتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور انہوں نے ابوزرعہ کا ایک قصہ بھی بیان کیا ہے جس کو میں نے کتاب المعرفۃ میں نقل کیا ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1863]

سیدنا عمرو بن شعیب رضی اللہ عنہ اپنے والد سے وہ ان کے دادا سے روایت کرتے ہیں کہ رسول اللہ صلی اللہ علیہ وسلم نے ارشاد فرمایا: جو شخص ایک دن میں 100 مرتبہ: ” لَا اِلٰہَ اِلَّا اللّٰہُ وَحْدَہُ لَا شَرِیْکَ لَہٗ الْمُلْکُ، وَلَہُ الْحَمْدُ، وَھُوَ عَلٰی کُلِّ شَیْئٍ قَدِیْر “ پڑھے، نہ تو سابقہ لوگوں میں سے کوئی اس سے زیادہ ثواب حاصل کر سکتا ہے اور نہ بعد میں آنے والوں میں سے کوئی اس کے ثواب کو پہنچ سکتا ہے البتہ جو آدمی اس سے بھی افضل عمل کرے (وہ اس سے آگے نکل سکتا ہے)۔ ٭٭ امام حاکم اپنی سند کے ہمراہ اسحاق بن ابراہیم کا بیان نقل کرتے ہیں کہ ” جب عمرو بن شعیب سے روایت کرنے والا راوی ثقہ ہو تو یہ سند ” ایوب عن نافع عن ابن عمر رضی اللہ عنہما کے درجے کی سند قرار پاتی ہے۔ امام حاکم فرماتے ہیں: میں نے کتاب کے شروع سے لے کر اس مقام تک عمرو بن شعیب کی کوئی حدیث نقل نہیں کی ہے۔ اور کتاب الدعاء والتسبیح کے آغاز میں، میں نے امام ابوسعید عبدالرحمن بن مہدی کا یہ مذہب بیان کر دیا تھا کہ فضائلِ اعمال سے متعلق احادیث کی سند کے معاملے میں قدرے نرم انداز اپنایا جاتا تھا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1864]

میں نے استاذ ابوالولید القرشی کو یہ کہتے ہوئے سنا کہ میں نے ابراہیم بن ابی طالب سے سنا، وہ بیان کرتے تھے کہ میں نے اسحاق بن ابراہیم (ابن راہویہ) کو یہ فرماتے سنا: ”جب عمرو بن شعیب سے روایت کرنے والا راوی ثقہ ہو، تو یہ سند (مضبوطی میں) ایسی ہی ہے جیسے ایوب کی نافع سے اور نافع کی ابن عمر رضی اللہ عنہما سے روایت ہوتی ہے“۔ امام حاکم فرماتے ہیں: میں نے کتاب کے آغاز سے لے کر اس مقام تک عمرو بن شعیب کی کوئی (فقہی) حدیث تخریج نہیں کی، اور میں نے ’کتاب الدعاء والتسبیح‘ کے شروع میں امام ابو سعید عبدالرحمن بن مہدی کا وہ موقف ذکر کر دیا ہے جس میں انہوں نے فضائلِ اعمال کی اسانید میں نرمی برتنے کی اجازت دی ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1864M]