عمرو بن شعیب نے اپنی اسی (مذکورہ بالا) سند سے اس حدیث کو روایت کیا اور گمشدہ بکری کے بارے میں اس کے لفظ ہیں «فَاجْمَعْهَا» یعنی ”اسے اپنی بکریوں کے ساتھ ملا لو۔“ [سنن ابي داود/كِتَاب اللُّقَطَةِ/حدیث: 1711]

عمرو بن شعیب نے اسی سند سے روایت کیا اور گمشدہ بکری کے سلسلے میں کہا: ”یہ تیرے لیے ہے یا تیرے بھائی کے لیے یا بھیڑیے کے لیے، اسے لے لے اور بس۔“ اور اسی طرح اس روایت میں ایوب اور یعقوب بن عطاء نے عمرو بن شعیب سے، انہوں نے نبی کریم صلی اللہ علیہ وسلم سے «فَخُذْهَا» ”پس تو اسے لے لے“ کا لفظ بیان کیا ہے۔ [سنن ابي داود/كِتَاب اللُّقَطَةِ/حدیث: 1712]

ابن اسحاق، عمرو بن شعیب سے، وہ (عمرو) اپنے والد سے، وہ اپنے دادا (عبداللہ بن عمرو بن عاص رضی اللہ عنہ) سے، وہ نبی کریم صلی اللہ علیہ وسلم سے یہی روایت کرتے ہیں تو ان کے لفظ ہیں: «فَاجْمَعْهَا حَتَّى يَأْتِيَهَا بَاغِيُهَا» ”اس کو اپنے مال کے ساتھ ملا لے حتیٰ کہ اس کا متلاشی آ جائے۔“ [سنن ابي داود/كِتَاب اللُّقَطَةِ/حدیث: 1713]

سیدنا ابو سعید خدری رضی اللہ عنہ سے مروی ہے کہ سیدنا علی بن ابی طالب رضی اللہ عنہ کو ایک دینار ملا۔ وہ اسے سیدہ فاطمہ رضی اللہ عنہا کے پاس لے آئے، سیدہ فاطمہ رضی اللہ عنہا نے اس کے بارے میں رسول اللہ صلی اللہ علیہ وسلم سے دریافت کیا تو آپ نے فرمایا: ”یہ اللہ عزوجل کا رزق ہے۔“ چنانچہ رسول اللہ صلی اللہ علیہ وسلم ، سیدنا علی رضی اللہ عنہ اور سیدہ فاطمہ رضی اللہ عنہا نے اس سے کھا لیا۔ اس کے بعد آپ کے پاس ایک عورت آئی جو ایک دینار ڈھونڈتی پھر رہی تھی۔ رسول اللہ صلی اللہ علیہ وسلم نے فرمایا: ”علی! وہ دینار ادا کر دو۔“ [سنن ابي داود/كِتَاب اللُّقَطَةِ/حدیث: 1714]

بلال بن یحییٰ عبسی سیدنا علی رضی اللہ عنہ سے نقل کرتے ہیں کہ: ”انہیں ایک دینار ملا، تو انہوں نے اس سے آٹا خریدا، آٹے والے نے سیدنا علی رضی اللہ عنہ کو پہچان لیا تو اس نے دینار ان کو واپس کر دیا۔ تو سیدنا علی رضی اللہ عنہ نے وہ لے لیا اور اس میں سے دو قیراط کاٹ کر ان کا گوشت خریدا۔“ [سنن ابي داود/كِتَاب اللُّقَطَةِ/حدیث: 1715]

سیدنا سہل بن سعد رضی اللہ عنہ کا بیان ہے کہ سیدنا علی رضی اللہ عنہ، سیدہ فاطمہ رضی اللہ عنہا کے ہاں (گھر میں) آئے تو (دیکھا کہ) حسن اور حسین رضی اللہ عنہما رو رہے ہیں۔ پوچھا: ”یہ کیوں رو رہے ہیں؟“ انہوں نے کہا: ”بھوک کی وجہ سے رو رہے ہیں۔“ پس سیدنا علی رضی اللہ عنہ (گھر سے) نکل آئے تو (اتفاق سے) بازار میں انہیں ایک دینار پڑا مل گیا، تو وہ سیدہ فاطمہ رضی اللہ عنہا کے پاس آئے اور بتایا (کہ اس طرح سے ملا ہے۔) انہوں نے کہا: ”فلاں یہودی کے پاس جائیں اور ہمارے لیے آٹا لے آئیں۔“ چنانچہ وہ یہودی کے پاس آئے اور اس سے آٹا خریدا۔ یہودی نے کہا: ”بھلا آپ اس شخص کے داماد ہیں جو اپنے آپ کو رسول اللہ کہتا ہے؟“ انہوں نے کہا: ”ہاں!“ تو اس نے کہا: ”دینار اپنے پاس رکھیں اور آٹا لے جائیں۔“ سیدنا علی رضی اللہ عنہ وہاں سے چلے اور سیدہ فاطمہ رضی اللہ عنہا کے پاس (آٹا) لے آئے اور ساری بات بتائی۔ انہوں نے کہا: ”فلاں قصاب کے پاس جائیں اور ایک درہم کا گوشت لے آئیں۔“ چنانچہ وہ گئے، اپنا دینار اس کے پاس رہن رکھا اور ایک درہم کا گوشت لے آئے۔ سیدہ فاطمہ رضی اللہ عنہا نے آٹا گوندھا، ہنڈیا چولہے پر رکھی، روٹی پکائی اور اپنے والد صلی اللہ علیہ وسلم کو بلا بھیجا۔ وہ ان کے ہاں تشریف لے آئے۔ تو سیدہ فاطمہ رضی اللہ عنہا نے کہا: ”اے اللہ کے رسول! میں آپ کو بتاؤں اگر آپ اسے حلال فرمائیں تو ہم اسے کھائیں گے اور آپ بھی ہمارے ساتھ کھائیں گے اور اس کا حال اس اس طرح سے ہے۔“ آپ صلی اللہ علیہ وسلم نے سن کر فرمایا: ”اللہ کا نام لے کر کھاؤ۔“ چنانچہ سب نے کھا لیا۔ ابھی وہ اپنی جگہ (دستر خوان ہی) پر بیٹھے تھے کہ ایک لڑکا، اللہ اور اسلام کا واسطہ دے کر اپنا گمشدہ دینار ڈھونڈتا پھر رہا تھا۔ تو رسول اللہ صلی اللہ علیہ وسلم نے حکم دیا اور اسے بلایا گیا۔ آپ نے اس سے پوچھا تو اس نے کہا: ”مجھ سے بازار میں (کہیں) گرا ہے۔“ تو نبی کریم صلی اللہ علیہ وسلم نے فرمایا: ”اے علی! اس قصاب کے پاس جاؤ اور اس سے کہو کہ اللہ کے رسول فرماتے ہیں: وہ دینار میرے ہاں بھیج دو اور تمہارا درہم میرے ذمے ہے۔“ چنانچہ اس نے دینار بھیج دیا۔ پھر رسول اللہ صلی اللہ علیہ وسلم نے اسے اس غلام کے حوالے کر دیا۔ [سنن ابي داود/كِتَاب اللُّقَطَةِ/حدیث: 1716]

سیدنا جابر بن عبداللہ رضی اللہ عنہ سے مروی ہے، فرماتے ہیں کہ ”رسول اللہ صلی اللہ علیہ وسلم نے ہمیں چھڑی، رسی، کوڑا اور اس قسم کی چیزیں اٹھا لینے کی رخصت دی تھی کہ انسان ان سے فائدہ اُٹھا لے۔“ امام ابوداؤد رحمہ اللہ فرماتے ہیں کہ ”اسے نعمان بن عبدالسلام نے مغیرہ (مغیرہ بن مسلم) ابوسلمہ سے اپنی سند سے روایت کیا ہے۔ اور شبابہ نے مغیرہ بن مسلم سے، انہوں نے ابوالزبیر سے، انہوں نے جابر رضی اللہ عنہ سے روایت کیا ہے (کہا کہ وہ لوگ چھڑی، کوڑا وغیرہ اٹھا لینے میں کوئی حرج نہ سمجھتے تھے) اور نبی کریم صلی اللہ علیہ وسلم کا ذکر نہیں کیا۔ (موقوف بیان کیا ہے)۔“ [سنن ابي داود/كِتَاب اللُّقَطَةِ/حدیث: 1717]

سیدنا ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”گمشدہ اونٹ پکڑنے والا اگر چھپا لے تو اس پر جرمانہ ہے اور (مزید) اس کے ساتھ اس کا مثل بھی۔“ [سنن ابي داود/كِتَاب اللُّقَطَةِ/حدیث: 1718]

سیدنا عبدالرحمن بن عثمان تیمی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ”حاجیوں کی گری پڑی چیزیں اٹھانے سے منع فرمایا ہے۔“ احمد رحمہ اللہ نے روایت کیا کہ ابن وہب نے کہا: ”حاجی کی چیز پڑی رہنے دی جائے حتیٰ کہ اس کا مالک اسے پالے۔“ ابن موہب نے (اپنی سند میں) «عَنْ عَمْرٍو» کہا ہے ( «أَخْبَرَنِي عَمْرٌو» نہیں کہا)۔ [سنن ابي داود/كِتَاب اللُّقَطَةِ/حدیث: 1719]

منذر بن جریر کہتے ہیں کہ ”(میں اپنے والد) جریر (جریر بن عبداللہ البجلی رضی اللہ عنہ) کے ساتھ بوازِیج (مقام ازیج) میں تھا کہ چرواہا گائیں لے کر آیا اور ان میں ایک گائے ان کی نہیں تھی۔ سیدنا جریر رضی اللہ عنہ نے پوچھا: ”یہ کیا ہے؟“ اس نے کہا: ”بس گایوں کے ساتھ مل گئی ہے، ہمیں معلوم نہیں کہ کس کی ہے۔“ تو سیدنا جریر رضی اللہ عنہ نے کہا: ”اسے علیحدہ کر دو، میں نے رسول اللہ صلی اللہ علیہ وسلم سے سنا ہے: ”گمشدہ چیز کو کوئی «ضَالٌّ» گمراہ انسان ہی لیتا ہے۔“”“ [سنن ابي داود/كِتَاب اللُّقَطَةِ/حدیث: 1720]