سیدنا محمد بن واسع رضی اللہ عنہ فرماتے ہیں: میں مدینۃ المنورہ میں آیا، وہاں میری ملاقات سالم بن عبداللہ بن عمر رضی اللہ عنہما سے ہوئی تو انہوں نے اپنے والد کا یہ بیان سنایا کہ سیدنا عمر بن خطاب رضی اللہ عنہ فرماتے ہی: جو شخص بازار میں داخل ہو اور یہ دعا پڑھ لے: ” لا الہ الا اللہ وحدہ لاشریک لہ، لہ الملک، ولہ الحمد، یحیی ویمیت، بیدہ الخیر، وھو علی کل شیء قدیر “ اللہ تعالیٰ اس کے لیے ایک لاکھ نیکیاں لکھ دیتا ہے اور ایک لاکھ گناہ مٹا دیتا ہے۔ اور اس کے لیے جنت میں ایک گھر بنا دیتا ہے۔ (محمد بن واسع) فرماتے ہیں: پھر میں خراسان آ گیا تو قتیبہ بن مسلم کے پاس آیا۔ ان سے میں نے کہا: میں تمہارے لیے ایک تحفہ لایا ہوں پھر میں نے ان کو یہ حدیث سنائی۔ پھر وہ اپنی سواری پر سوار ہو کر بازار کے دروازے تک آتے اور یہ دعا پڑھ کر واپس چلے جاتے تھے۔ اس حدیث کے عمرو بن دینار قہرمان آل الزبیر کے سالم سے متعدد طرق ہیں اور اس کی سند میں جو ازہر بن سنان ہیں یہ بصری ہیں، زاہد ہیں۔ اس حدیث کی ایک شاہد حدیث بھی موجو دہے۔ (جو کہ درج ذیل ہے) سیدنا سالم بن عبداللہ رضی اللہ عنہ اپنے والد سے وہ ان کے دادا سے مرفوعاً روایت کرتے ہیں کہ جو شخص بازار میں جائے اور پڑھے: ” لا الہ الا اللہ وحدہ لاشریک لہ، لہ الملک، ولہ الحمد، یحیی ویمیت، وھو حیٌّ لا یموت بیدہ الخیر، وھو علی کل شیء قدیر “ اللہ تعالیٰ اس کے لیے ایک لاکھ نیکیاں لکھ دیتا ہے اور اس کے ایک لاکھ گناہ مٹا دیتا ہے اور اس کے لیے جنت میں ایک گھر بنا دیتا ہے۔ ٭٭ عبداللہ بن وھب نے اس حدیث کو یونہی روایت کیا ہے اور اسماعیل بن عیاش نے اس کو عمر بن محمد بن زید کے واسطے سے سالم سے روایت کیا ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1995]

اور عمر بن محمد بن زید کے واسطے سے، سالم بن عبداللہ بن عمر رضی اللہ عنہما سے ان کے والد کے حوالے سے سیدنا عمر رضی اللہ عنہ سے منقول ہے کہ رسول اللہ صلی اللہ علیہ وسلم نے ارشاد فرمایا: جو شخص بازار میں جا کر یہ پڑھے: لا الہ الا اللہ وحدہ لاشریک لہ، لہ الملک، ولہ الحمد، یحیی ویمیت، وھو حیٌّ لا یموت بیدہ الخیر، وھو علی کل شیء قدیر اللہ تعالیٰ اس کے نامۂ اعمال میں ایک لاکھ نیکیاں لکھ دیتا ہے اور اس کے ایک لاکھ گناہ مٹا دیتا ہے اور اس کے ایک لاکھ درجے بلند کر دیتا ہے۔اور یہی حدیث ہم نے ہشام بن حسان کے واسطے سے عبداللہ بن دینار سے نقل کی ہے۔ (جو کہ درج ذیل ہے)۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1996]

سیدنا عمر بن خطاب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص بازار میں داخل ہوا اور اس نے یہ کہا: ’اللہ کے سوا کوئی معبود نہیں، وہ اکیلا ہے، اس کا کوئی شریک نہیں، اسی کی بادشاہی ہے اور اسی کے لیے تمام تعریفیں ہیں، وہی زندگی دیتا ہے اور وہی موت دیتا ہے، وہ خود ہمیشہ زندہ ہے اسے موت نہیں آئے گی، تمام خیر اس کے ہاتھ میں ہے اور وہ ہر چیز پر قادر ہے‘، تو اللہ تعالیٰ اس کے لیے دس لاکھ نیکیاں لکھ دیتا ہے، اس کے دس لاکھ گناہ مٹا دیتا ہے اور اس کے دس لاکھ درجے بلند فرما دیتا ہے“۔ ہم نے اس حدیث کو ہشام بن حسان کے واسطے سے عبداللہ بن دینار کی روایت سے بھی لکھا ہے: [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1997]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص بازار میں جائے اور وہاں خرید و فروخت کرے پھر پڑھے: لا الہ الا اللہ وحدہ لاشریک لہ، لہ الملک، ولہ الحمد، یحیی ویمیت، وھو علی کل شیء قدیر “ اللہ تعالیٰ اس کے لیے ایک لاکھ نیکیاں لکھ دیتا ہے اور اس کے ایک لاکھ گناہ مٹا دیتا ہے۔ اور اس کے لیے جنت میں ایک گھر بنا دیتا ہے۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ واللہ اعلم۔ اس حدیث کو عبداللہ بن دینار سے روایت کرنے میں عمران بن مسلم نے ہشام بن حسان کی متابعت کی ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1998]

سیدنا ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص بازار میں یہ دعا پڑھے: لا الہ الا اللہ وحدہ لاشریک لہ، لہ الملک، ولہ الحمد، بیدہ الخیر، وھو علی کل شیء قدیر اللہ تعالیٰ اس کے نامہ اعمال میں ایک لاکھ نیکیاں لکھ دیتا ہے اور اس کے گناہ معاف فرما دیتا ہے اور اس کے لیے جنت میں ایک مکان بنا دیتا ہے۔ ٭٭ اس باب میں سیدنا جابر، ابوہریرہ، بریدہ اسلمی اور انس رضی اللہ تعالیٰ عنہم سے بھی احادیث مروی ہیں اور اس کتاب کی شرائط کے مطابق سب سے مضبوط حدیث سیدنا بریدہ رضی اللہ عنہ کی ہے جبکہ اس کے الفاظ کچھ مختلف ہیں (ان کی مروی حدیث درج ذیل ہے) [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1999]

سیدنا بریدہ رضی اللہ عنہ فرماتے ہیں کہ رسول اللہ صلی اللہ علیہ وسلم بازار میں جاتے تو پڑھتے: اللھم انی اسألک خیر ھذہ السوق، وخیر مافیھا، واعوذبک من شرھا، وشر مافیھا، اللّٰھمّ انّی اعوذبک ان اصیب فیھا یمیناً فاجرۃ، او صفقۃ خاسرۃ او صفقہ خاسرۃ۔ ” اے اللہ میں تجھ سے اس بازار اور جو کچھ اس میں ہے، اس کی بھلائی کا سوال کرتا ہوں اور اس بازار اور اس میں جو کچھ بھی ہے، اس سے تیری پناہ مانگتا ہوں، اے اللہ! میں تجھ سے پناہ مانگتا ہوں، اس بات سے کہ میں جھوٹی قسم کا مرتکب ہوں یا میں خسارے والا سودا کروں۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2000]