سیدنا عبداللہ بن عمر رضی اللہ عنہ سے مروی ہے، فرماتے ہیں کہ ”رسول اللہ صلی اللہ علیہ وسلم نے اہل مدینہ کے لیے ذوالحلیفہ (موجودہ آبارِ علی)، اہل شام کے لیے جحفہ، اہل نجد کے لیے قرن المنازل کے مقامات متعین فرمائے تھے۔ اور مجھے یہ خبر بھی پہنچی ہے کہ آپ صلی اللہ علیہ وسلم نے اہل یمن کے لیے یلملم متعین کیا تھا۔“ [سنن ابي داود/كِتَاب الْمَنَاسِكِ/حدیث: 1737]

حماد، عمرو بن دینار سے، وہ طاؤس سے، وہ ابن عباس رضی اللہ عنہما سے اور ابن طاؤس (عبداللہ) اپنے باپ طاؤس سے (وہ ابن عباس رضی اللہ عنہما سے) روایت کرتے ہیں کہ ان دونوں (عمرو بن دینار اور عبداللہ بن طاؤس) نے کہا: ”رسول اللہ صلی اللہ علیہ وسلم نے میقات (مقاماتِ احرام) مقرر فرمائے تھے۔“ ان دونوں میں سے ایک نے کہا کہ اہل یمن کے لیے «يَلَمْلَمُ» اور دوسرے نے کہا «العَلَمُ» ۔ آپ صلی اللہ علیہ وسلم نے فرمایا: ”یہ مقامات ان (مذکورہ) جگہوں کے رہنے والوں کے لیے ہیں اور دوسری جگہوں کے ان لوگوں کے لیے بھی جو یہاں سے گزریں جو کہ حج اور عمرہ کی نیت رکھتے ہوں اور جو ان سے ورے (مکہ کی جانب) مقیم ہوں۔“ ابن طاؤس نے کہا: ”وہ وہیں سے احرام باندھیں جہاں سے وہ سفر شروع کریں حتیٰ کہ اہل مکہ اپنے شہر اور گھر ہی سے احرام باندھ کر نکلیں۔“ [سنن ابي داود/كِتَاب الْمَنَاسِكِ/حدیث: 1738]

ام المؤمنین سیدہ عائشہ رضی اللہ عنہا سے روایت ہے: ”رسول اللہ صلی اللہ علیہ وسلم نے اہل عراق کے لیے ”ذات عرق“ کا مقام متعین فرمایا تھا (احرام کے لیے)۔“ [سنن ابي داود/كِتَاب الْمَنَاسِكِ/حدیث: 1739]

سیدنا ابن عباس رضی اللہ عنہ سے مروی ہے کہ ”رسول اللہ صلی اللہ علیہ وسلم نے اہل مشرق کے لیے مقام «الْعَقِيقُ» ”عقیق“ مقرر فرمایا تھا۔“ [سنن ابي داود/كِتَاب الْمَنَاسِكِ/حدیث: 1740]

ام المؤمنین سیدہ ام سلمہ رضی اللہ عنہا بیان کرتی ہیں کہ انہوں نے رسول اللہ صلی اللہ علیہ وسلم کو فرماتے ہوئے سنا: ”جس نے مسجد اقصیٰ سے مسجد الحرام تک حج یا عمرے کا احرام باندھا، اس کے اگلے پچھلے سب گناہ معاف کر دیے جائیں گے۔ یا فرمایا: اس کے لیے جنت واجب ہو گئی۔“ عبداللہ (ابن عبدالرحمٰن بن یحنس) کو شک ہوا ہے کہ معلوم نہیں آپ صلی اللہ علیہ وسلم نے دونوں سے کون سی بات کہی تھی۔ امام ابوداؤد رحمہ اللہ فرماتے ہیں: ”اللہ تعالیٰ وکیع رحمہ اللہ پر رحمت فرمائے، انہوں نے بیت المقدس سے مکہ کے لیے احرام باندھا۔“ [سنن ابي داود/كِتَاب الْمَنَاسِكِ/حدیث: 1741]

جناب حارث بن عمرو سہمی رضی اللہ عنہ بیان کرتے ہیں کہ میں رسول اللہ صلی اللہ علیہ وسلم کی خدمت میں حاضر ہوا جبکہ آپ صلی اللہ علیہ وسلم منیٰ یا عرفات میں تھے۔ لوگوں نے آپ صلی اللہ علیہ وسلم کو گھیر رکھا تھا۔ بدوی لوگ آپ صلی اللہ علیہ وسلم کے پاس آتے تھے، جب آپ صلی اللہ علیہ وسلم کا چہرہ انور دیکھتے تو کہتے: ”یہ تو مبارک چہرہ ہے۔“ حارث رضی اللہ عنہ بیان کرتے ہیں کہ آپ صلی اللہ علیہ وسلم نے اہل عراق کے لیے مقام «ذَاتُ عِرْقٍ» ”ذات عرق“ کو میقات مقرر فرمایا۔ [سنن ابي داود/كِتَاب الْمَنَاسِكِ/حدیث: 1742]