سیدنا ابن عباس رضی اللہ عنہما کا فرمان ہے: رسول اللہ صلی اللہ علیہ وسلم نے جلالہ (پلیدی کھانے والے جانور) کا دودھ پینے اور مجثمہ (وہ پرندہ یا خرگوش جس کو باندھ کر تیر وغیرہ مارا جائے یہاں تک کہ وہ مر جائے) کا گوشت کھانے اور مشکیزے کے منہ سے (منہ لگا کر) پینے سے منع فرمایا۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ عبداللہ بن عمر رضی اللہ عنہما اور ابوہریرہ رضی اللہ عنہ سے مروی احادیث مذکورہ حدیث کی شاہد ہیں (جیسا کہ درج ذیل ہے)۔ ابن عمر رضی اللہ عنہما کی حدیث: [المستدرك على الصحيحين/كِتَابُ: الْبُيُوعِ/حدیث: 2278]

سیدنا ابن عمر رضی اللہ عنہما فرماتے ہیں کہ: رسول اللہ صلی اللہ علیہ وسلم نے جلالہ (پلیدی کھانے والے جانور) کا گوشت کھانے اور اس کا دودھ پینے سے منع کیا ہے۔ [المستدرك على الصحيحين/كِتَابُ: الْبُيُوعِ/حدیث: 2279]

سیدنا ابن عمر رضی اللہ عنہما فرماتے ہیں کہ: رسول اللہ صلی اللہ علیہ وسلم نے جلالہ اونٹنی پر سوار ہونے اور اس کا دودھ پینے سے منع کیا۔ سیدنا ابوہریرہ رضی اللہ عنہ کی حدیث: [المستدرك على الصحيحين/كِتَابُ: الْبُيُوعِ/حدیث: 2280]

سیدنا ابوہریرہ رضی اللہ عنہ فرماتے ہیں کہ: رسول اللہ صلی اللہ علیہ وسلم نے مجثمہ اور جلالہ سے منع کیا۔ [المستدرك على الصحيحين/كِتَابُ: الْبُيُوعِ/حدیث: 2281]