عمرو بن شعیب اپنے والد اور وہ اپنے دادا سے روایت کرتے ہیں کہ رسول اللہ صلی اللہ علیہ وسلم نے فرمایا: ”کسی عورت کے لیے اپنے مال میں (بغیر اجازتِ شوہر) تصرف کرنا جائز نہیں ہے جب وہ رشتہ نکاح میں منسلک ہو جائے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2330]

میں نے حافظ علی بن عمر الحافظ کو فرماتے ہوئے سنا کہ میں نے ابوبکر بن زیاد فقیہ نیشاپوری کو فرماتے ہوئے سنا کہ میں نے محمد بن علی حمدان الوراق کو فرماتے سنا: میں نے امام احمد بن حنبل رحمہ اللہ سے دریافت کیا کہ کیا عمرو بن شعیب نے اپنے والد سے کچھ سنا ہے؟ تو انہوں نے جواب دیا: ”وہ عمرو بن شعیب بن محمد بن عبداللہ بن عمرو ہیں، اور تحقیق عمرو بن شعیب کا اپنے والد شعیب سے سماع صحیح ہے، اور شعیب کا اپنے دادا سیدنا عبداللہ بن عمرو رضی اللہ عنہما سے سماع صحیح ثابت ہے۔“ [المستدرك على الصحيحين/كِتَابُ: الْبُيُوعِ/حدیث: 2330M]

سیدنا صفوان بن امیہ رضی اللہ عنہ سے روایت ہے کہ نبی کریم صلی اللہ علیہ وسلم نے غزوہ حنین کے دن ان سے کچھ زرہیں عاریت (ادھار) مانگیں، تو انہوں نے پوچھا: اے محمد ( صلی اللہ علیہ وسلم )! کیا یہ غصب (زبردستی لینا) ہے؟ آپ صلی اللہ علیہ وسلم نے فرمایا: ”نہیں، بلکہ یہ ایسی عاریت ہے جس کی واپسی کی ضمانت دی جاتی ہے۔“
اس کا ایک شاہد سیدنا ابن عباس رضی اللہ عنہما سے بھی مروی ہے۔ [المستدرك على الصحيحين/كِتَابُ: الْبُيُوعِ/حدیث: 2331]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے غزوہ حنین کے موقع پر سیدنا صفوان بن امیہ رضی اللہ عنہ سے کچھ زرہیں اور اسلحہ ادھار مانگا، تو انہوں نے پوچھا: اے اللہ کے رسول! کیا یہ ایسی عاریت ہے جو واپس کر دی جائے گی؟ آپ صلی اللہ علیہ وسلم نے فرمایا: ”ایسی ہی عاریت ہے جو واپس کر دی جائے گی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2332]

سیدنا سمرہ بن جندب رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”ہاتھ پر اس چیز کی ذمہ داری ہے جو اس نے لی، یہاں تک کہ وہ اسے ادا کر دے۔“ پھر امام حسن بصری اپنی اس روایت کو بھول گئے اور فرمانے لگے کہ (جس کے پاس چیز رکھی جائے) وہ تو تمہارا امین ہے، اس پر کوئی ضمانت نہیں ہے۔
یہ حدیث صحیح الاسناد ہے اور امام بخاری کی شرط پر ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2333]