سیدنا عبداللہ بن عباس رضی اللہ عنہما سے روایت ہے کہ میں حجرِ اسود کے پاس بیٹھا ہوا تھا کہ ایک شخص میرے پاس آیا اور مجھ سے ﴿وَالْعَادِيَاتِ ضَبْحًا﴾ کے بارے میں سوال کیا، میں نے اسے کہا: ”اس سے مراد وہ گھوڑے ہیں جو اللہ کی راہ میں دشمن پر چھاپہ مارتے ہیں اور پھر رات کو ٹھکانہ ڈھونڈتے ہیں، تو وہ لوگ اپنا کھانا بناتے اور اپنی آگ جلاتے ہیں“، وہ شخص وہاں سے مڑا اور سیدنا علی بن ابی طالب رضی اللہ عنہ کے پاس گیا جو زمزم کے پانی پلانے کی جگہ کے نیچے تشریف فرما تھے، اس نے ان سے ”العادیات“ کے بارے میں پوچھا، انہوں نے فرمایا: ”کیا تم نے مجھ سے پہلے کسی سے اس کے بارے میں پوچھا ہے؟“ اس نے کہا: ”جی ہاں، میں نے ابن عباس سے پوچھا تھا تو انہوں نے کہا کہ اس سے مراد وہ گھوڑے ہیں جو اللہ کی راہ میں حملہ کرتے ہیں“، انہوں نے فرمایا: ”جاؤ اور انہیں میرے پاس بلا لاؤ“، راوی کہتا ہے کہ جب وہ (ابن عباس) ان کے پاس آ کر کھڑے ہوئے تو انہوں نے فرمایا: ”تم لوگوں کو بغیر علم کے فتویٰ دے رہے ہو، اللہ کی قسم! اسلام کا پہلا غزوہ بدر تھا اور ہمارے پاس صرف دو گھوڑے تھے، ایک سیدنا زبیر کا اور ایک سیدنا مقداد بن اسود کا، تو پھر «العاديات ضبحا» کیسے ہو سکتے ہیں؟ دراصل «العاديات ضبحا» سے مراد (حج کے موقع پر) عرفہ سے مزدلفہ اور مزدلفہ سے منیٰ کی طرف (تیزی سے جانے والے اونٹ) ہیں، اور ﴿فَأَثَرْنَ بِهِ نَقْعًا﴾ سے مراد وہ زمین ہے جب وہ اپنے کھروں اور پاؤں سے اسے روندتے ہیں“، ابن عباس رضی اللہ عنہما کہتے ہیں: پھر میں نے اپنے قول سے رجوع کر لیا اور اسی بات کی طرف لوٹ آیا جو سیدنا علی رضی اللہ عنہ نے فرمائی تھی۔ [سورة العاديات: 1-4]
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، انہوں نے ابوصخر یعنی حمید بن زیاد اور ابومعاویہ بجلی یعنی عمار بن ابی معاویہ دہنی سے احتجاج کیا ہے۔ [المستدرك على الصحيحين/كِتَابُ: الْجِهَادِ/حدیث: 2538]