سیدنا ابو موسیٰ اشعری رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اللہ تعالی نے سیدنا آدم علیہ السلام کو پوری زمین کی بالائی سطح سے پیدا فرمایا، چنانچہ ان کی اولاد بھی اسی تناسب سے پیدا ہوئی، ان میں کوئی سفید ہے تو کوئی سیاہ، کوئی گندمی ہے تو کوئی سرخ اور کوئی ان کے درمیانی رنگ کا ہے، اسی طرح ان میں کوئی نرم مزاج ہے تو کوئی برا اور کوئی پاکیزہ طبع ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3074]

سیدنا ابی بن کعب رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”بے شک سیدنا آدم علیہ السلام ایک طویل القامت شخص تھے گویا کہ وہ ایک لمبا کھجور کا درخت ہوں، ان کے سر کے بال بہت گھنے تھے، پھر جب ان سے لغزش سرزد ہوئی تو ان کا ستر ان پر ظاہر ہو گیا حالانکہ اس سے پہلے وہ اسے نہیں دیکھتے تھے، چنانچہ وہ جنت میں بھاگنے لگے تو ایک درخت میں الجھ گئے، انہوں نے اس سے کہا: مجھے چھوڑ دے، اس نے کہا: میں تجھے نہیں چھوڑوں گا، پھر ان کے رب نے انہیں پکارا: اے آدم! کیا تم مجھ سے بھاگ رہے ہو؟ انہوں نے عرض کیا: اے میرے رب! بلاشبہ مجھے تجھ سے حیا آ رہی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3075]