سیدنا ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: قرآن کی آیات کی سردار آیۃ الکرسی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3067]

سیدنا نعمان بن بشیر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: اللہ تعالیٰ نے زمین و آسمان کی تخلیق سے دو ہزار سال قبل ایک کتاب (یعنی قرآن کریم) لکھی ان میں سے دو آیتیں نازل فرمائی ہیں جن پر سورۂ بقرہ ختم ہوتی ہے۔ (ان کی فضیلت یہ ہے کہ) جس گھر میں ان کی تلاوت کی جاتی ہو شیطان اس گھر کے قریب بھی نہیں آ سکتا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3068]

سیدنا عبداللہ بن مسعود رضی اللہ عنہ ” الم ذالک الکِتَاب لاریب فیہُ “ (البقرۃ: 1-2) ” الم وہ بلند مرتبہ کتاب کوئی شک کی جگہ نہیں اس میں “۔ کے متعلق فرماتے ہیں ” الم “ ایک حرف ہے، اللہ کا نام ہے اور ” الْکِتَاب “ (سے مراد) قرآن پاک ہے ” لَا رَیْبَ فِیْہ “ (کا مطلب یہ ہے کہ) اس میں کوئی شک نہیں ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3069]

سیدنا عبدالرحمن رضی اللہ عنہ فرماتے ہیں: سیدنا عبداللہ رضی اللہ عنہ کے ہاں محمد صلی اللہ علیہ وسلم کے اصحاب اور ان کے ایمان کا تذکرہ ہوا تو سیدنا عبداللہ رضی اللہ عنہ بولے: جس شخص نے محمد صلی اللہ علیہ وسلم کو دیکھا تھا اس کے لیے آپ کا معاملہ بالکل واضح تھا۔ اس ذات کی قسم جس کے سوا کوئی معبود نہیں ہے، ایمان بالغیب سے بہتر کسی مومن کا ایمان نہیں ہے۔ پھر آپ نے ” الم ذٰلِکَ الْکِتَابُ لَارَیْبَ فِیْہِ “ (البقرۃ: 1-2) ” الم وہ بلند رتبہ کتاب کوئی شک کی جگہ نہیں اس میں “۔ ” یُؤْمِنُوْنَ بِالْغَیْبِ “ (البقرۃ: 3) ” وہ جو بے دیکھے ایمان لائیں “۔ تک تلاوت کی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3070]

سیدنا عبداللہ بن مسعود رضی اللہ عنہ فرماتے ہیں: اللہ تعالیٰ نے قرآن پاک کی اس آیت: ” وَقُوْدُھَا النَّاسُ وَالْحِجَارَۃُ حِجَارَۃٌ “ (البقرۃ: 24) ” جس کا ایندھن آدمی اور پتھر ہیں “۔ میں جس حجارہ کا ذکر کیا ہے (اس سے مراد) کبریت کا پتھر ہے، جسے اللہ تعالیٰ نے اپنے ہاں جیسے چاہا پیدا کیا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3071]

سیدنا ابن عباس رضی اللہ عنہما فرماتے ہیں: اللہ تعالیٰ نے کسی کے جنت میں داخل ہونے سے پہلے سیدنا آدم علیہ السلام کو جنت سے نکال دیا۔ اللہ تعالیٰ نے فرمایا: ” اِنِّیْ جَاعِلٌ فِی الْاَرْضِ خَلِیْفَۃً قَالُوْآ اَتَجْعَلُ فِیْھَا مَنْ یُّفْسِدُ فِیْھَا وَ یَسْفِکُ الدِّمَآئَ “ (البقرۃ: 30) ” میں زمین میں اپنا نائب بنانے والا ہوں بولے کیا ایسے کو نائب کرے گا جو اس میں فساد پھیلائے خونریزیاں کرے “۔ اور انسان کی تخلیق سے دو ہزار سال پہلے زمین پر جنات آباد تھے، جب انہوں نے زمین میں فسادات شروع کیے تو اللہ تعالیٰ نے ان پر فرشتوں کے لشکر بھیجے۔ ان لشکروں نے جنات کو مار مار کر سمندروں کے جزیروں میں پناہ لینے پر مجبور کر دیا تو ملائکہ نے اللہ تعالیٰ سے عرض کی: ” اَتَجْعَلُ فِیْھَا مَنْ یُّفْسِدُ فِیْھَا “ (البقرۃ: 30) ” کیا ایسے کو نائب کرے گا جو اس میں فساد پھیلائے اور خونریزیاں کرے۔ جیسا کہ ان جنات نے فسادات کیے تھے تو اللہ تعالیٰ نے فرمایا: میں وہ کچھ جانتا ہوں جو تم نہیں جانتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3072]

سیدنا ابن عباس رضی اللہ عنہما فرماتے ہیں: جب اللہ تعالیٰ نے سیدنا آدم علیہ السلام کی تخلیق مکمل فرما دی اور اس میں روح ڈالی تو آدم علیہ السلام کو چھینک آئی، تو انہوں نے ” اَلْحَمْدُلِلّٰہ “ کہا۔ اس کے جواب میں اللہ تعالیٰ نے کہا:” یَرْحَمُکَ رَبُّکَ “ (تیرا رب تجھ پر رحم کرے۔) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ اس کو عتاب نے خصیف سے مسند کیا ہے تاہم یہ راوی اس کتاب کے معیار کے نہیں ہیں۔ [المستدرك على الصحيحين/كِتَابُ التَّفْسِيرِ/حدیث: 3073]