سیدنا ابوالعالیہ رضی اللہ عنہ کا بیان ہے: میں سیدنا ابن عباس رضی اللہ عنہما کے ہمراہ چل رہا تھا اور سیدنا ابن عباس رضی اللہ عنہما احرام کی حالت میں تھے وہ اپنے اونٹ پر حدی خوانی کرتے ہوئے یوں کہہ رہے تھے ” اور وہ ہمارے ساتھ آہستہ چال چل رہی ہیں (ابوالعالیہ) کہتے ہیں: میں نے کہا: آپ احرام کی حالت میں رفث کر رہے ہو؟ تو آپ نے فرمایا: رفث تو وہ ہوتی ہے جس کے ذریعے عورتوں کو متوجہ کیا جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3130]

سیدنا ابن عمر رضی اللہ عنہما کہتے ہیں:” رفث “ (سے مراد) ” جماع “ ہے اور ” فسوق “ سے مراد شکار وغیرہ کرنے کی احرام کی خلاف ورزی ہے اور ” جدال “ سے مراد گالی گلوچ اور لڑائی جھگڑا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3131]

سیدنا ابن عباس رضی اللہ عنہما فرماتے ہیں: لوگ اسلام کے اوائل میں، ایام حج میں ” سوق المجاز “ کی طرح منٰی میں بھی خرید و فروخت کیا کرتے تھے جب قرآن پاک نازل ہوا تو لوگوں میں خوف پیدا ہو گیا، اللہ تعالیٰ نے یہ آیت نازل فرما دی: لَیْسَ عَلَیْکُمْ جُنَاحٌ اَنْ تَبْتَغُوْا فَضْلًا مِّنْ رَّبِّکُمْ (البقرۃ: 198) ” تم پر کچھ گناہ نہیں کہ اپنے رب کا فضل تلاش کرو “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3132]