سیدنا ابوذر رضی اللہ عنہ فرماتے ہیں: میں رسول اللہ صلی اللہ علیہ وسلم کی بارگاہ میں حاضر ہوا، اس وقت آپ صلی اللہ علیہ وسلم مسجد میں تشریف فرما تھے۔ آپ صلی اللہ علیہ وسلم نے نماز، روزہ اور صدقہ کی فضیلت کا ذکر کیا (سیدنا ابوذر رضی اللہ عنہ) کہتے ہیں: میں نے کہا: یا رسول اللہ صلی اللہ علیہ وسلم آپ کے اوپر نازل ہونے والی سب سے عظیم آیت کون سی ہے؟ آپ صلی اللہ علیہ وسلم نے فرمایا: اَللہُ لَآ اِٰلہَ اِلَّا ھُوَ الْحَیُّ الْقَیُّوْمُ (البقرۃ: 255) ” اللہ ہے جس کے سوا کوئی معبود نہیں وہ آپ زندہ اور اوروں کا قائم رکھنے والا ہے “۔ اسی ایک آیت کا ذکر کیا یہاں تک کہ اس کو ختم کیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3152]

سیدنا ابن عباس رضی اللہ عنہما فرماتے ہیں: کرسی اس کے دونوں قدموں کی جگہ ہے جبکہ عرش اس کو برداشت کرنے کی استطاعت نہیں رکھتا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3153]