سیدنا (عبداللہ) بن عباس رضی اللہ عنہما سے مروی ہے رسول اللہ صلی اللہ علیہ وسلم نے یہ آیت پڑھی: یٰٓاَیُّھَا الَّذِیْنَ ٰامَنُوا اتَّقُوا اللّٰہَ حَقَّ تُقٰتِہٖ وَلَا تَمُوْتُنَّ اِلَّا وَاَنْتُمْ مُّسْلِمُوْنَ (آل عمران: 102) ” اے ایمان والو! اللہ سے ڈرو جیسا اس سے ڈرنے کا حق ہے اور ہرگز نہ مرنا مگر مسلمان “۔ پھر آپ صلی اللہ علیہ وسلم نے فرمایا: اس ذات کی قسم جس کے قبضہ قدرت میں میری جان ہے۔ اگر ” زقوم “ (جہنم کا ایک درخت) کا صرف ایک قطرہ زمین کے تمام سمندروں میں ڈال دیا جائے تو (تمام روئے زمین کا پانی) ناقابل استعمال ہو جائے۔ اور سیدنا وہب بن جریر رضی اللہ عنہ کی روایت میں یوں ہے: تو دنیا والوں پر عرصہ حیات تنگ ہو جائے تو ان لوگوں کا کیا حشر ہو گا جن کی خوراک ہی یہ (زقوم) ہو گی (العیاذباللہ)۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3196]

سیدنا عبداللہ بن مسعود رضی اللہ عنہ اللہ تعالیٰ کے ارشاد: اتَّقُوا اللّٰہَ حَقَّ تُقٰاتہ (آل عمران: 102) ” اللہ سے ڈرو جیسا اس سے ڈرنے کا حق ہے “۔ کے متعلق فرماتے ہیں (اس کا مطلب یہ ہے) اس کی اطاعت کی جائے اور نافرمانی نہ کی جائے، اس کو یاد کیا جائے اور اس کو بھولیں نہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3197]