سیدنا (عبداللہ) بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے خطبہ دیا اور ارشاد فرمایا: اے لوگو! بے شک اللہ تعالیٰ نے تم پر حج فرض کیا ہے۔ تو سیدنا اقرع بن حابس رضی اللہ عنہ کھڑے ہو کر بولے: یا رسول اللہ صلی اللہ علیہ وسلم : کیا ہر سال حج کرنا فرض ہے؟ رسول اللہ صلی اللہ علیہ وسلم نے فرمایا: اگر میں (ہاں) کہہ دیتا تو (ہر سال حج) فرض ہو جاتا اور اگر (ہر سال) فرض ہو جاتا تو تم اس پر عمل نہ کرتے اور نہ تم میں اس کی استطاعت ہوتی۔ حج (تمام عمر میں) ایک دفعہ فرض ہے جو اس سے زائد ہے وہ نفل ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ سفیان بن حسین الواسطی نے زہری کے حوالے سے یہ حدیث روایت کی ہے جیسا کہ درج ذیل ہے۔ [المستدرك على الصحيحين/كِتَابُ التَّفْسِيرِ/حدیث: 3193]

سیدنا سفیان بن حسین زہری کے ذریعے ابوسنان سے روایت کرتے ہیں کہ سیدنا (عبداللہ) بن عباس رضی اللہ عنہما فرماتے ہیں: سیدنا اقرع بن حابس رضی اللہ عنہ نے رسول اللہ صلی اللہ علیہ وسلم سے پوچھا: کیا حج ہر سال ادا کرنا ضروری ہے؟ آپ صلی اللہ علیہ وسلم نے فرمایا: نہیں بلکہ (زندگی بھر میں) صرف ایک مرتبہ (حج کرنا ضروری ہے) جو ایک سے زیادہ کرے گا وہ نفلی حج ہوں گے۔ ٭٭ اس موضوع پر سیدنا علی بن ابی طالب رضی اللہ عنہ نے رسول اکرم صلی اللہ علیہ وسلم کے حوالے سے شرح وبسط کے ساتھ وضاحت فرمائی ہے۔ (جیسا کہ درج ذیل ہے۔) [المستدرك على الصحيحين/كِتَابُ التَّفْسِيرِ/حدیث: 3194]

سیدنا علی رضی اللہ عنہ فرماتے ہیں: جب یہ آیت: (وَ لِلّٰہِ عَلَی النَّاسِ حِجُّ الْبَیْتِ مَنِ اسْتَطَاعَ اِلَیْہِ سَبِیْلًا) (آل عمران: 97) ” اور اللہ کے لیے لوگوں پر اس گھر کا حج کرنا ہے جو اس تک چل سکے “۔ نازل ہوئی تو صحابہ کرام رضوان اللہ علیہم اجمعین نے دریافت کیا: کیا ہر سال حج فرض ہے؟ آپ صلی اللہ علیہ وسلم خاموش رہے، صحابہ کرام رضوان اللہ علیہم اجمعین نے دوبارہ پوچھا: کیا ہر سال حج فرض ہے؟ آپ صلی اللہ علیہ وسلم پھر بھی خاموش رہے۔ صحابہ کرام رضوان اللہ علیہم اجمعین نے پھر پوچھا: کیا ہر سال حج فرض ہے؟ آپ صلی اللہ علیہ وسلم نے فرمایا: نہیں۔ (اور فرمایا) اگر میں ” ہاں “ کہہ دیتا تو (ہر سال حج) فرض ہو جاتا تو اللہ تبارک و تعالیٰ نے یہ آیت نازل فرمائی: یٰٓاَیُّھَا الَّذِیْنَ ٰامَنُوْا لَا تَسْئَلُوْا عَنْ اَشْیَآئَ اِنْ تُبْدَ لَکُمْ تَسُؤْکُمْ (المائدہ: 101) ” اے ایمان والو! ایسی باتیں نہ پوچھو جو تم پر ظاہر کی جائیں تو تمہیں بری لگیں “۔ ٭٭ امام حاکم رحمۃ اللہ علیہ کہتے ہیں: مذکورہ تینوں حدیثوں کا حق تو یہ تھا کہ ان کو کتاب المناسک کے آغاز میں درج کرتے لیکن میں ایسا نہ کر سکا اس لیے اب میں ان کو آیت کی تفسیر کے تحت درج کر رہا ہوں۔ [المستدرك على الصحيحين/كِتَابُ التَّفْسِيرِ/حدیث: 3195]