سیدنا حذیفہ رضی اللہ عنہ فرماتے ہیں: اللہ تعالیٰ کی بارگاہ میں ایک ایسا آدمی لایا جائے گا جس کو اللہ تعالیٰ نے مال و دولت سے نوازا ہو گا۔ اللہ تعالیٰ اس سے فرمائے گا: تو نے دنیا میں کیا کیا نیک عمل کیے ہیں؟ (اللہ تعالیٰ) فرماتا ہے: (وَلَا یَکْتُمُوْنَ اللّٰہَ حَدِیْثًا) (النساء: 42) ” اور کوئی بات اللہ سے نہ چھپا سکیں گے “۔ وہ کہے گا: یا اللہ میں نے کوئی نیک عمل نہیں کیا۔ سوائے اس کے کہ تو نے مجھے دولت دی تھی، میں خرید و فروخت کیا کرتا تھا اور میری یہ عادت تھی کہ خوشحالی سے بھی خوش اسلوبی کے ساتھ وصولی کیا کرتا تھا جبکہ تنگدست کو مہلت دے دیا کرتا تھا۔ اللہ تعالیٰ فرمائے گا: اس چیز کا تجھ سے زیادہ میرا حق بنتا ہے (پھر اللہ تعالیٰ فرشتوں سے فرمائے گا) میرے بندے کو معاف کر دو۔ سیدنا عقبہ بن عامر الجہنی رضی اللہ عنہ اور سیدنا ابومسعود الانصاری رضی اللہ عنہ نے کہا: ہم نے رسول اللہ صلی اللہ علیہ وسلم کی زبان حق ترجمان سے بھی بالکل ایسے ہی سنا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3236]

سیدنا عبداللہ بن عباس رضی اللہ عنہما سے مروی ہے: ایک آدمی نے آپ سے اس آیت کے متعلق پوچھا: وَ اللّٰہِ رَبِّنَا مَا کُنَّا مُشْرِکِیْنَ (الانعام: 23) ” ہمیں اپنے رب اللہ کی قسم کہ ہم مشرک نہ تھے “۔ “ اور دوسری آیت میں ہے: وَلَا یَکْتُمُوْنَ اللّٰہَ حَدِیْثًا) (النساء: 42) ” اور کوئی بات اللہ سے نہ چھپا سکیں گے “۔ ابن عباس نے کہا:” وَاللّٰہِ رَبِّنَا مَا کُنَّا مُشْرِکِیْنَ “ کا مطلب یہ ہے کہ جب مشرکین قیامت کے دن دیکھ لیں گے کہ جنت میں تو صرف مسلمان ہی جا رہے ہیں تو وہ (ایک دوسرے سے) کہیں گے: آؤ ہم اپنے شرک کا انکار کر دیں۔ تو اللہ تعالیٰ ان کے منہ سیل بند کر دے گا۔ پھر ان کے ہاتھ اور پاؤں ان کے خلاف گواہی دے دیں گے ” تو وہ اللہ سے کوئی بات چھپا نہیں پائیں گے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3237]