سیدنا (عبداللہ) بن عمر رضی اللہ عنہما فرماتے ہیں: نبی اکرم صلی اللہ علیہ وسلم نے (جنگ بدر کے) قیدیوں کے متعلق سیدنا ابوبکر سے مشورہ کیا تو انہوں نے جواباً کہا: یا رسول اللہ صلی اللہ علیہ وسلم یہ سب لوگ آپ کے قبیلے اور برادری سے تعلق رکھنے والے ہیں (میرا تو مشورہ یہ ہے کہ) ان کو معاف فرما دیں۔ پھر آپ نے سیدنا عمر رضی اللہ عنہ سے مشورہ کیا تو انہوں نے جواباً کہا: (یا رسول اللہ صلی اللہ علیہ وسلم ) ان کو قتل کر دیں (راوی کہتے ہیں: رسول اللہ صلی اللہ علیہ وسلم نے ان کو فدیہ لے کر چھوڑ دیا تو اللہ تعالیٰ نے یہ آیت نازل فرمائی (مَا کَانَ لِنَبِیٍّ اَنْ یَّکُوْنَ لَہٗٓ اَسْرٰی حَتّٰی یُثْخِنَ فِی الْاَرْضِ) (الانفال: 67) ” کسی نبی کو لائق نہیں کہ کافروں کو زندہ قید کرے جب تک زمین میں ان کا خؤن نہ بہائے (تم لوگ دنیا کا مال چاہتے ہو اور اللہ آخرت چاہتا ہے اور اللہ غالب حکمت والا ہے اگر اللہ پہلے ایک بات لکھ نہ چکا ہوتا تو اے مسلمانوں تم نے جو کافروں سے بدلے کا مال لیا اس میں تم پر بڑا عذاب آتا۔) “، فَکُلُوْا مِمَّا غَنِمْتُمْ حَلٰلًا طَیِّبًا (الانفال: 69) ” تو کھاؤ جو غنیمت تمہیں ملی حلال پاکیزہ “ اور اللہ سے ڈرتے رہو بیشک اللہ بخشنے والا مہربان ہے “۔ تک۔ (راوی) کہتے ہیں، اس کے بعد نبی اکرم صلی اللہ علیہ وسلم کی سیدنا عمر رضی اللہ سے ملاقات ہوئی تو آپ صلی اللہ علیہ وسلم نے فرمایا ” آپ کے مشورے پر عمل نہ کرنے کی وجہ سے قریب تھا کہ ہم کسی آزمائش میں مبتلا ہو جاتے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3309]

سیدنا خثیمہ رضی اللہ عنہ کا بیان ہے: سیدنا سعد بن ابی وقاص رضی اللہ عنہ چند لوگوں میں موجود تھے وہاں پر سیدنا علی رضی اللہ عنہ کا ذکر ہوا تو کچھ لوگوں نے آپ کو برا بھلا کہنا شروع کر دیا، تو سیدنا سعد رضی اللہ عنہ بولے: رسول اللہ صلی اللہ علیہ وسلم کے اصحاب کو برا بھلا مت کہو کیونکہ ہم نے رسول اللہ صلی اللہ علیہ وسلم کے ہمراہ دنیا کی دولت پائی تو اللہ تعالیٰ نے یہ آیت نازل فرمائی: لَوْلَا کِتٰبٌ مِّنَ اللّٰہِ سَبَقَ لَمَسَّکُمْ فِیْمَآ اَخَذْتُمْ عَذَابٌ عَظِیْمٌ (الانفال: 68) ” اگر اللہ پہلے ایک بات لکھ نہ چکا ہوتا تو اے مسلمانو! تم نے جو کافروں سے بدلے کا مال لے لیا ہے اس میں تم پر بڑا عذاب آتا “۔ تو میں اس بات کی امید رکھتا ہوں کہ اللہ تعالیٰ کی رحمت ہماری طرف سبقت کر گئی ہو گی تو ان میں سے کچھ لوگوں نے کہا: خدا کی قسم وہ تو آپ سے عداوت رکھتے تھے اور تمہیں چپٹے ناک والا اور ابھرے ہوئے سر والا کہا کرتے تھے، اس پر سیدنا سعد رضی اللہ عنہ مسکرا دیئے پھر آپ نے فرمایا: کیا ایسا نہیں ہے کہ انسان کبھی اپنے بھائی کے خلاف کسی معاملہ میں ایسی چیز پاتا ہے جو صرف ان دونوں کے درمیان ہوتی ہے لیکن بعد میں وہ اس کی امانتداری کو قائم نہیں رکھ سکتا، اس کے علاوہ بھی سیدنا سعد رضی اللہ عنہ نے کوئی بات کہی تھی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3310]