سیدنا کعب بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا: اللہ تعالیٰ قیامت کے دن لوگوں کو اٹھائے گا تو میں اور میری امت ایک ٹیلے پر ہوں گے اور مجھے سبز رنگ کا جبہ پہنایا جائے گا، پھر مجھے اذن دیا جائے گا اور میں کہوں گا جو کچھ اللہ چاہے گا پس یہی ” مقام محمود “ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3423]

سیدنا حذیفہ بن یمان رضی اللہ عنہما فرماتے ہیں: میں رسول اللہ صلی اللہ علیہ وسلم کو اللہ تعالیٰ کے ارشاد: عَسٰٓی اَنْ یّبْعَثَکَ رَبُّکَ مَقَامًا مَّحْمُوْدًا (الاسراء: 79) ” قریب ہے کہ تمہیں تمہارا رب ایسی جگہ کھڑا کرے جہاں سب تمہاری حمد کریں “۔ کے متعلق فرماتے سنا ہے: اللہ تعالیٰ تمام لوگوں کو ایک مقام پر جمع فرمائے گا۔ ان کو بلانے والا سنائے گا اور آنکھیں ان کو دیکھیں گی، ننگے پاؤں اور ننگے بدن جس حالت پر ان کی پیدائش ہوئی۔ سب خاموش ہوں گے اور کوئی نفس اس کی اجازت کے بغیر بول بھی نہیں سکے گا پھر محمد صلی اللہ علیہ وسلم کو آواز دی جائے گی۔ آپ صلی اللہ علیہ وسلم جواباً کہیں گے: میں حاضر ہوں اور تمام بھلائی تیرے ہاتھ میں ہے اور تمام شر تیری ہی طرف ہے۔ ہدایت یافتہ وہی ہے جس کو تو نے ہدایت دی اور تیرا بندہ تیرے سامنے حاضر ہے اور تیرے ہی لیے ہے اور تیری ہی طرف ہے اور تیرے علاوہ کوئی ٹھکانہ اور کوئی جائے پناہ نہیں، تو برکت والا ہے، بلند ہے۔ اے کعبہ کے رب تو پاک ہے۔ پس یہی وہ مقام محمود ہو گا جس کا اللہ تعالیٰ قرآن میں ان الفاظ میں وعدہ کیا ہے: عَسٰٓی اَنْ یّبْعَثَکَ رَبُّکَ مَقَامًا مَّحْمُوْدًا (الاسراء: 79) ” قریب ہے کہ تمہیں تمہارا رب ایسی جگہ کھڑا کرے جہاں سب تمہاری حمد کریں “۔۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ تاہم امام مسلم رحمۃ اللہ علیہ نے ابومالک اشجعی پھر ربعی بن حراش کے واسطے سے سیدنا حذیفہ رضی اللہ عنہ کے حوالے سے صرف ” لیخرجن من النار “ کے الفاظ نقل کیے ہیں۔ [المستدرك على الصحيحين/كِتَابُ التَّفْسِيرِ/حدیث: 3424]