سیدنا معاذ بن جبل رضی اللہ عنہ فرماتے ہیں: ایک دفعہ ہم رسول اللہ صلی اللہ علیہ وسلم کے ہمراہ غزوہ تبوک میں موجود تھے کہ شدید گرمی پڑی، جس کی وجہ سے صحابہ کرام رضوان اللہ علیہم اجمعین منتشر ہو گئے۔ میں نے دیکھا کہ میں سب لوگوں سے زیادہ رسول اللہ صلی اللہ علیہ وسلم کے قریب ہوں۔ آپ فرماتے ہیں: میں آپ کے اور بھی قریب آیا اور عرض کی: یا رسول اللہ صلی اللہ علیہ وسلم مجھے کوئی ایسا عمل بتا دیجئے جو مجھے جنت میں لے جائے اور دوزخ سے دور کر دے۔ آپ صلی اللہ علیہ وسلم نے فرمایا: تو نے بہت عظیم سوال کیا ہے؟ اور یہ چیز اس شخص کے لیے تو بہت آسان ہے، جس کے لیے اللہ تعالیٰ آسان کر دے۔ اللہ تعالیٰ کی عبادت کر، اس کے ساتھ کسی کو شریک مت ٹھہرا، فرض نمازیں ادا کر، فرض زکوۃ ادا کر، ماہ رمضان کے روزے رکھ۔ پھر آپ نے فرمایا: اگر تو چاہے تو میں تجھے جنت کے دروازوں کے بارے میں بتاؤں؟ میں نے کہا: جی ہاں۔ یا رسول اللہ صلی اللہ علیہ وسلم ! آپ نے فرمایا: روزہ ڈھال ہے اور صدقہ خطاؤں کو مٹاتا ہے اور رضائے الٰہی کی خاطر آدمی کا رات کے پچھلے پہر قیام کرنا۔ پھر آپ نے یہ آیت پڑھی: تَتَجَافٰی جُنُوْبُھُمْ عَنِ الْمَضَاجِعِ یَدْعُوْنَ رَبَّھُمْ خَوْفًا وَّ طَمَعًا وَّ مِمَّا رَزَقْنٰھُمْ یُنْفِقُوْنَ (السجدۃ: 16) ” ان کی کروٹیں جدا ہوتی ہیں خوابگاہوں سے اور اپنے رب کو پکارتے ہیں ڈرتے اور امید کرتے اور ہمارے دیے ہوئے سے کچھ خیرات کرتے ہیں “۔ پھر آپ نے فرمایا: اگر تو چاہے تو میں تجھے اصل بات، اس کی گہرائی اور اس کی بلندی بتاؤں؟ میں نے کہا: جی ہاں یا رسول اللہ صلی اللہ علیہ وسلم ! آپ نے فرمایا: حقیقی امر تو ” اسلام “ ہے، اس کی گہرائی نماز ہے اور اس کی بلندی ” جہاد فی سبیل اللہ “ ہے۔ آپ نے فرمایا: اگر تو چاہے تو ان تمام کے سرمایہ کے بارے میں بتاؤں؟ پھر آپ خاموش ہو گئے۔ اچانک دو سوار ہماری طرف آ رہے تھے مجھے یہ خدشہ ہوا کہ یہ آپ کو اپنی طرف متوجہ کر لیں گے اور میری بات ادھوری رہ جائے گی۔ میں نے عرض کی: یا رسول اللہ صلی اللہ علیہ وسلم ! وہ کیا ہے؟ آپ نے انگلی سے اپنے منہ کی جانب اشارہ کیا۔ میں نے پوچھا: یا رسول اللہ صلی اللہ علیہ وسلم ! کیا ہماری گفتگو پر بھی ہماری پکڑ ہو گی؟ آپ نے فرمایا: اے ابن جبل! تیری ماں تجھے روئے لوگ جہنم میں ناک کے بل اوندھے ڈالے جائیں گے وہ سب ان کی زبان ہی کا کیا دھرا ہے۔ نوٹ: یہ الفاظ جریر کی روایت کے ہیں اور ابواسحاق فزاری نے اپنی حدیث میں حکم بن عتیبہ کا ذکر نہیں کیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3590]