ابو الجنوب اسدی نے بیان فرمایا کہ علی رضی اللہ عنہ کے پاس مسلمانوں میں سے ایک آدمی لایا گیا جس نے ذمیوں میں سے ایک آدمی کو قتل کیا تھا۔ جب اس کے اوپر گواہی قائم ہو گئی تو آپ رضی اللہ عنہ نے اس کے قتل کا حکم دیا، تو مقتول کا بھائی آ گیا اور اس نے کہا: میں نے اسے معاف کر دیا۔ تو علی رضی اللہ عنہ نے فرمایا: شاید انہوں نے تجھے ڈرایا دھمکایا ہے یا تجھے پریشان کیا ہے۔ اس نے کہا: نہیں، لیکن اس کو قتل کر دینے سے میرا بھائی تو واپس نہیں آئے گا، انہوں نے مجھے دیت دے دی اور میں راضی ہو گیا۔ آپ رضی اللہ عنہ نے فرمایا: تو بہتر جانتا ہے، ہاں جس کی ہم پر ذمہ داری ہے اس کا خون ہمارے خون کی مانند اور اس کی دیت ہماری دیت کی طرح ہے۔ [المستدرك على الصحيحين/كِتَابُ التَّفْسِيرِ/حدیث: 3707]

مجاہد اور حسن رحمہما اللہ سے روایت ہے کہ رسول اللہ صلی اللہ علیہ وسلم نے فتح مکہ والے دن فرمایا: ”مومن کو کافر کے بدلے میں قتل نہیں کیا جائے گا۔“ [المستدرك على الصحيحين/كِتَابُ التَّفْسِيرِ/حدیث: 3708]

ابو جحیفہ رضی اللہ عنہ سے روایت ہے، انہوں نے فرمایا: میں نے علی رضی اللہ عنہ سے پوچھا: کیا آپ کے پاس رسول اللہ صلی اللہ علیہ وسلم کی طرف سے قرآن کے علاوہ کوئی چیز ہے؟ تو انہوں نے فرمایا: اس ذات کی قسم جس نے دانے سے کونپل کو نکالا اور مخلوق کو پیدا کیا! ہمارے پاس کچھ نہیں، سوائے اس فہم کے جو اللہ تعالیٰ کسی بندے کو اپنی کتاب میں دے دے اور جو کچھ اس صحیفہ میں ہے۔ میں نے پوچھا: اس صحیفہ میں کیا ہے؟ تو انہوں نے فرمایا: دیت کے احکام، قیدیوں کو چھڑوانے کے احکام اور یہ کہ ”کسی مسلمان کو کافر کے بدلے میں قتل نہ کیا جائے گا۔“ دوسری جگہ میں ہے کہ ”کسی مومن کو کافر کے بدلے قتل نہیں کیا جائے گا۔“ [المستدرك على الصحيحين/كِتَابُ التَّفْسِيرِ/حدیث: 3709]

ابو جحیفہ رضی اللہ عنہ نے بیان فرمایا کہ میں نے علی رضی اللہ عنہ سے پوچھا: کیا تمہارے پاس نبی صلی اللہ علیہ وسلم کی تعلیمات میں سے قرآن کے علاوہ بھی کوئی چیز ہے؟ تو انہوں نے فرمایا: اس ذات کی قسم جس نے دانے سے کونپل کو پھاڑا اور مخلوق کو پیدا کیا! کچھ نہیں، سوائے اس فہم کے جو کسی آدمی کو قرآن میں عطا کیا گیا اور جو کچھ اس صحیفہ میں ہے۔ میں نے پوچھا: صحیفہ میں کیا ہے؟ انہوں نے فرمایا: ”دیت کے مسائل، قیدیوں کو چھڑوانے کے احکامات اور یہ کہ کسی مومن کو کافر کے بدلے قتل نہ کیا جائے۔“ [المستدرك على الصحيحين/كِتَابُ التَّفْسِيرِ/حدیث: 3710]