سیدنا عبداللہ بن عباس رضی اللہ عنہما سے مروی ہے کہ اس آیت: وَ اِنَّہٗ لَعِلْمٌ لِّلسَّاعَۃِ (الزخرف: 61) ” اور بیشک وہ قیامت کی نشانی ہے۔“ میں (قیامت کی نشانی سے مراد) سیدنا عیسیٰ علیہ السلام کا نزول ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3716]

سیدنا جابر رضی اللہ عنہ فرماتے ہیں: رسول اللہ صلی اللہ علیہ وسلم نے یہ آیت پڑھی: وَ اِنَّہٗ لَعِلْمٌ لِّلسَّاعَۃِ (الزخرف: 61) پھر فرمایا: ستارے آسمان والوں کے لئے امان ہیں، جب یہ ختم ہو جائیں گے تو ان پر وہ آئے گا جس کا ان سے وعدہ کیا گیا اور میں اپنے اصحاب کے لئے امان ہوں، جب تک ان میں موجود ہوں، جب میں چلا جاؤں گا تو ان پر وہ کچھ آئے گا جس کا ان سے وعدہ کیا گیا اور میرے اہل بیت میری امت کے لئے امان ہیں، جب میرے اہل بیت چلے جائیں گے تو ان پر وہ کچھ آئے گا جس کا ان سے وعدہ کیا گیا ہے۔ (یعنی قیامت آ جائے گی) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3717]

سیدنا عبداللہ بن عباس رضی اللہ عنہما اللہ تعالیٰ کے ارشاد: وَ نَادَوْا یٰمٰلِکُ لِیَقْضِ عَلَیْنَا رَبُّکَ (الزخرف: 77) ” اور وہ پکاریں گے اے مالک تیرا رب ہمیں تمام کر چکے۔“ کے متعلق فرماتے ہیں: ایک ہزار سال کے بعد مالک (داروغہ جہنم) ان کو جواب دے گا ” انکم ما کثون “ تمہیں تو یہیں ٹھہرنا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3718]