سیدنا جابر بن عبداللہ رضی اللہ عنہ فرماتے ہیں: رسول اللہ صلی اللہ علیہ وسلم نے صحابہ کرام رضوان اللہ علیہم اجمعین کو سورۃ رحمن سنائی، جب آپ پوری سورۃ پڑھ چکے تو آپ نے فرمایا: کیا وجہ ہے، میں تم سب کو خاموش کیوں دیکھتا ہوں؟ جواب دینے کے اعتبار سے تو ” جن “ تم سے اچھے ہیں کیونکہ میں نے ان کے سامنے جب بھی: فَبِاَیِّ اٰلَآئِ رَبِّکُمَا تُکَذِّبٰنِ (الرحمن: 13) ” تم اپنے رب کی کون کون سی نعمت کو جھٹلاؤ گے۔“ پڑھا تو انہوں نے آگے سے جواباً کہا: اے ہمارے رب! ہم تیری کسی بھی نعمت کو نہیں جھٹلاتے اور تیرے ہی لئے حمد ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3808]

سیدنا عبداللہ بن عباس رضی اللہ عنہما اللہ تعالیٰ کے ارشاد: ھَلْ تَعْلَمُ لَہٗ سَمِیًّا (مریم: 65) ” کیا اس کے نام کا دوسرا جانتے ہو۔“ کے متعلق فرماتے ہیں۔ اللہ کے سوا اور کسی کو ” رحمن “ نہ کہا جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3809]

سیدنا عبداللہ بن عباس رضی اللہ عنہما ”اَلشَّمْسُ وَ الْقَمَرُ بِحُسْبَانٍ“ (سورج اور چاند حساب سے ہیں) کے متعلق فرماتے ہیں: حساب اور منازل سے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3810]

سیدنا عبداللہ بن عباس رضی اللہ عنہما ” وَالنَّجْم وَالشَّجَرُ “ کے بارے میں فرماتے ہیں: النجم سے مراد زمین کی بیل بوٹیاں اور الشجر سے مراد تنے والا درخت یا پودا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3811]