ام المومنین سیدہ عائشہ رضی اللہ عنہا فرماتی ہیں: برکت والی ہے وہ ذات جس کی سماعت ہر چیز پر حاوی ہے، بے شک میں خولہ بنت ثعلبہ رضی اللہ عنہا کا کلام سنتی ہوں جبکہ یہ بعض لوگوں پر مخفی ہے، وہ رسول اللہ صلی اللہ علیہ وسلم کی خدمت میں اپنے شوہر کی شکایت لے کر آئیں وہ کہہ رہی تھیں: یا رسول اللہ صلی اللہ علیہ وسلم ! اس نے میری جوانب برباد کر دی، میرا پیٹ اس کے لئے پھیل چکا ہے لیکن اب جبکہ مجھے بڑھاپے نے آ لیا اور اس کے لئے میری اولاد کا سلسلہ ختم ہو چکا تو اس نے مجھ سے ظہار کر لیا۔ اے اللہ! میں تیری بارگاہ میں یہ شکایت لاتی ہوں۔ ام المومنین رضی اللہ عنہا فرماتی ہیں: وہ مسلسل یونہی دعا مانگتی رہی حتیٰ کہ سیدنا جبریل امین علیہ السلام یہ آیات لے کر نازل ہوئے: قَدْ سَمِعَ اللّٰہُ قَوْلَ الَّتِیْ تُجَادِلُکَ فِیْ زَوْجِھَا (المجادلۃ: 1) ” بیشک اللہ نے سنی اس کی بات جو تم سے اپنے شوہر کے معاملہ میں بحث کرتی ہے۔“ (راوی کہتے ہیں: اس کا شوہر ” عبادہ بن صامت رضی اللہ عنہ “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ ہشام بن عروہ اپنے والد کے حوالے سے سیدہ عائشہ رضی اللہ عنہا سے مختصراً روایت کیا ہے (جیسا کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3833]

ہشام بن عروہ اپنے والد کے حوالے سے سیدہ عائشہ رضی اللہ عنہا سے روایت کرتے ہیں کہ جمیلہ رضی اللہ عنہا، اوس بن صامت رضی اللہ عنہ کی بیوی تھیں اور اس کو تھوڑی سی جنون کی شکایت تھی۔ جب ان کے جنون میں شدت آئی تو انہوں نے اپنی بیوی سے ظہار کر لیا تو ان کے متعلق اللہ تعالیٰ نے کفارہ ظہار کا حکم نازل فرمایا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3834]