3896 - سیدنا عبداللہ بن مسعود رضی اللہ عنہ کے پاس دجال کا ذکر کیا گیا تو انہوں نے فرمایا: اے لوگو! اس کے خروج کے وقت تم تین گروہوں میں بٹ جاؤ گے۔ پھر سیدنا ابن مسعود رضی اللہ عنہ نے فرمایا: اے کافرو! (قرآن کی یہ آیات تلاوت کیں)“تمہیں کس چیز نے دوزخ میں داخل کیا؟ وہ کہیں گے: ہم نماز پڑھنے والوں میں سے نہ تھے، اور نہ ہم مسکینوں کو کھانا کھلاتے تھے، اور ہم لغویات میں پڑنے والوں کے ساتھ پڑے رہتے تھے، اور ہم روزِ جزا کو جھٹلایا کرتے تھے، یہاں تک کہ ہمیں یقینی موت آ پہنچی۔ تو اب سفارش کرنے والوں کی سفارش انہیں کوئی فائدہ نہیں دے گی۔ ”پھر سیدنا ابن مسعود رضی اللہ عنہ نے فرمایا: کیا تم نہیں دیکھتے کہ ان لوگوں میں جو تھوڑی بہت بھلائی تھی وہ بھی چھوڑ دی گئی؟ پھر جب اللہ تعالیٰ یہ چاہے گا کہ ان میں سے کوئی بھی جہنم سے باہر نہ نکلے تو ان کے چہرے اور رنگ بدل دیے جائیں گے۔ پھر ایک مومن آدمی نکلے گا اور کہے گا: اے میرے رب! تو اللہ تعالیٰ فرمائے گا: جو کسی آدمی کو پہچانتا ہو وہ اسے نکال لے۔ وہ دیکھے گا مگر کسی کو پہچان نہ سکے گا۔ اس پر ایک شخص اسے پکارے گا: اے فلاں! میں فلاں ہوں۔ وہ کہے گا: میں تمہیں نہیں پہچانتا۔ اسی وقت وہ لوگ کہیں گے: اے ہمارے رب! ہمیں یہاں سے نکال لے، پھر اگر ہم دوبارہ (گناہوں کی طرف) لوٹیں تو بے شک ہم ظالم ہوں گے۔ تب اللہ تعالیٰ فرمائے گا: یہیں ذلیل ہو کر پڑے رہو اور مجھ سے بات نہ کرو۔ جب یہ کہا: جائے گا تو جہنم ان پر بند کر دی جائے گی، پھر اس کے بعد کبھی کوئی بھی وہاں سے نہیں نکلے گا۔ یہ حدیث صحیح ہے، شیخین (امام بخاری رحمہ اللہ اور امام مسلم) کی شرط کے مطابق ہے، اگرچہ انہوں نے اسے اپنی کتابوں میں روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3917]

ابوالزعراء رضی اللہ عنہ کہتے ہیں: سیدنا عبداللہ بن مسعود رضی اللہ عنہ کے پاس دجال کا تذکرہ ہوا تو انہوں نے فرمایا: اے لوگو! اس کے ظاہر ہونے پر تم تین جماعتوں میں بٹ جاؤ گے۔ پھر سیدنا عبداللہ بن مسعود رضی اللہ عنہ نے کہا: (اللہ تعالیٰ فرمائے گا) اے کافرو! تمہیں کیا بات دوزخ میں لے گئی؟ وہ بولے: ہم نماز نہ پڑھتے تھے اور مسکین کو کھانا نہ دیتے تھے اور بیہودہ فکر والوں کے ساتھ بیہودہ فکر کرتے تھے اور ہم انصاف کے دن کو جھٹلاتے رہے۔ یہاں تک کہ ہمیں موت آئی تو انہیں سفارشیوں کی سفارش کام نہ دے گی۔ پھر عبداللہ بن مسعود رضی اللہ عنہ نے کہا: کیا تم ان میں بھلائی نہیں دیکھتے ہو مگر اس میں چھوڑ دیا گیا، جب اللہ تعالیٰ ارادہ کرے گا کہ کوئی اس میں سے باہر نہ نکلے تو ان کے چہرے اور رنگ تبدیل فرما دے گا۔ تب ایک آدمی مومنین میں سے نکلے گا اور عرض کرے گا: اے میرے رب۔ اللہ تعالیٰ فرمائے گا: تو جس جس کو پہچانتا ہے ان کو نکال لا۔ وہ دیکھے گا تو کسی کو بھی نہ پہچان سکے گا، اس کو آدمی یوں آوازیں دے گا۔ اے فلاں! میں فلاں شخص ہوں۔ وہ کہے گا: میں تجھے نہیں پہچانتا ہوں۔ اس وقت وہ لوگ کہیں گے ” اے ہمارے رب ہم کو دوزخ سے نکال دے پھر اگر ہم ویسے ہی کریں تو ہم ظالم ہیں۔ اس وقت اللہ تعالیٰ فرمائے گا: دھتکارے یعنی خائب و خاسر پڑے رہو، اس میں اور مجھ سے بات نہ کرو۔ جب اللہ تعالیٰ یہ فرمائے گا تو جہنم ان کو ڈھانپ لے گی پھر اس کے بعد کبھی بھی کوئی جہنم سے باہر نہیں نکل سکے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ سیدنا ابوموسیٰ رضی اللہ عنہ، اللہ تعالیٰ کے ارشاد: فَرَّتْ مِنْ قَسْوَرَۃٍ (المدثر: 51) ” شیر سے بھاگے ہوں۔“ کے متعلق فرماتے ہیں (قسورہ کا مطلب) شکار کی طرح (ڈر کر) بھاگنے والے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3918]

سیدنا انس بن مالک رضی اللہ عنہ فرماتے ہیں: رسول اللہ صلی اللہ علیہ وسلم نے (یہ آیت) پڑھی: وَ مَا تَشَآءُوْنَ اِلَّا اَنْ یّشَآءَ اللّٰہُ ھُوَ اَھْلُ التَّقْوٰی وَ اَھْلُ الْمَغْفِرَۃِ) (المدثر: 56) ” اور وہ کیا نصیحت مانیں مگر جب اللہ چاہے، وہی ہے ڈرنے کے لائق اور اسی کی شان ہے مغفرت فرمانا۔“ آپ نے فرمایا: تمہارا رب عزوجل فرماتا ہے: میں اس بات کا اہل ہوں کہ میرے ساتھ کسی کو شریک ٹھہرانے سے بچا جائے اور میں ہی اس بات کا اہل ہوں کہ جو شرک سے بچتا رہے میں اس کو بخش دوں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3919]