سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: جو آدمی قیامت کے دن کا نظارہ کرنا چاہتا ہو وہ ” اِذا الشمس کوّرت “ پڑھ لیا کرے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3944]

سیدنا عبداللہ بن عباس رضی اللہ عنہما اللہ تعالیٰ کے ارشاد: وَ اِذَا الْوُحُوْشُ حُشِرَتْ (التکویر: 5) ” اور جب وحشی جانور جمع کیے جائیں گے “ کے متعلق فرماتے ہیں: انسان اور جنات کے سوا تمام مخلوقات جانور وغیرہ کا حشر ان کی موت ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3945]

سیدنا عمر بن خطاب رضی اللہ عنہ اللہ تعالیٰ کے ارشاد: وَ اِذَا النُّفُوْسُ زُوِّجَتْ (التکویر: 7) ” اور جب جانوں کے جوڑ بنیں “ کے متعلق فرماتے ہیں: یہ دو آدمی ہیں جو عمل کرتے ہیں، وہ اپنے اپنے عمل کی بناء پر جنت اور دوزخ میں جائیں گے۔ فاجر، فاجر کے ہمراہ اور نیک، نیک کے ہمراہ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3946]

سیدنا عبداللہ بن مسعود رضی اللہ عنہ، اللہ تعالیٰ کے ارشاد: فَلَآ اُقْسِمُ بِالْخُنَّسِ الْجَوَارِ الْکُنَّسِ (التکویر: 15، 16) ” تو قسم ہے ان کی جو الٹے پھریں، سیدھے چلیں، تھم رہیں “ کے متعلق فرماتے ہیں (اس سے مراد) جنگلی گائے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3947]

سیدنا خالد بن عرعرہ رضی اللہ عنہ کہتے ہیں: جب سیدنا عثمان رضی اللہ عنہ کو شہید کر دیا گیا تو میں اس وجہ سے شدید خوف زدہ ہو گیا۔ میں سیدنا علی رضی اللہ عنہ کے پاس آ گیا۔ ابھی میں ان کے پاس ہی تھا کہ ایک آدمی نے آپ سے سوال کیا کہ ” الْجَوَارُ الْکُنَّسُ “ کیا ہے؟ آپ نے فرمایا: ستارے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3948]

سیدنا ابوعبدالرحمن رضی اللہ عنہ سے منقول ہے کہ سیدنا علی رضی اللہ عنہ ایک مرتبہ طلوع فجر کے وقت نکلے اور بولے وتر کے لئے یہ کتنا اچھا وقت ہے۔ پھر آپ نے یہ آیت تلاوت کی: وَ الَّیْلِ اِذَا عَسْعَسَ وَ الصُّبْحِ اِذَا تَنَفَّسَ (التکویر: 17، 18) ” اور رات کی قسم جب پیٹھ دے، اور صبح کی جب دم لے “ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3949]