ام المومنین سیدہ عائشہ رضی اللہ عنہما فرماتی ہیں: یہ آیت ” عبس وتولّٰی “ نابینا صحابی سیدنا عبداللہ ابن ام مکتوم رضی اللہ عنہ کے بارے میں نازل ہوئی۔ آپ (اس کی تفصیل بیان کرتے ہوئے) فرماتی ہیں: (سیدنا عبداللہ ابن ام مکتوم رضی اللہ عنہ) رسول اکرم صلی اللہ علیہ وسلم کی خدمت میں حاضر ہوئے اور کہنے لگے: مجھے ہدایت فرمائیے۔ آپ فرماتی ہیں: اس وقت حضور صلی اللہ علیہ وسلم کے پاس مشرکین کے بڑے بڑے لوگ آئے ہوئے تھے۔ آپ فرماتی ہیں: رسول اللہ صلی اللہ علیہ وسلم نے اس سے توجہ ہٹا کر ان کی جانب متوجہ ہو گئے اور فرمایا: تمہارا کیا خیال ہے میں جو کچھ کہہ رہا ہوں اس میں کوئی حرج ہے؟ اس (عبداللہ بن ام مکتوم) نے کہا: جی نہیں۔ اس موقع پر یہ آیت ” عبس وتولی “ نازل ہوئی۔ (محض اللہ رب العزت کے دین کی سربلندی کی خواہش میں ان شرفاء کی جانب زیادہ توجہ فرمائی۔ کیونکہ دل اطہر میں یہ خیال تھا کہ اگر یہ لوگ اسلام قبول کر لیں گے تو اسلام بہت جلدی سے پھیلے گا۔ شفیق) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ تاہم (محدثین رحمۃ اللہ علیہم کی ایک) جماعت نے ہشام بن عروہ سے ارسال کیا ہے۔ [المستدرك على الصحيحين/كِتَابُ التَّفْسِيرِ/حدیث: 3940]

سیدنا انس بن مالک رضی اللہ عنہ کا بیان ہے کہ سیدنا عمر بن خطاب رضی اللہ عنہ فرماتے ہیں: فَاَنْبَتْنَا فِیْھَا حَبًّا وَّ عِنَبًا وَّ قَضْبًا وَّ زَیْتُوْنًا وَّ نَخْلًا وَّ حَدَآئِقَ غُلْبًا وَّ فَاکِھَۃً وَّ اَبًّا (عبس: 27 تا 31) ” تو اس میں اگایا اناج، اور انگور اور چارہ، اور زیتون اور کھجور، اور گھنے باغیچے، اور میوے اور گھاس “ (انس بن مالک رضی اللہ عنہ) کہتے ہیں ہم ان سب کو پہچانتے ہیں لیکن ” اب “ کا کیا مطلب ہے؟ پھر انہوں نے وہ عصا توڑ دیا جو ان کے ہاتھ میں تھا آپ نے فرمایا: خدا کی قسم! یہ تکلف ہے تم اس کی پیروی کرو جو تمہارے لئے اس کتاب سے ظاہر ہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3941]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم نے ارشاد فرمایا: لوگوں کو قیامت کے دن ننگے بدن ننگے پاؤں غیر مختون اٹھایا جائے گا، وہ اپنے پسینے میں ڈوب رہے ہوں گے، ان کا پسینہ کان کی لو کے برابر پہنچ رہا ہو گا۔ ام المومنین رضی اللہ عنہا فرماتی ہیں: میں نے کہا: یا رسول اللہ صلی اللہ علیہ وسلم ! افسوس کہ لوگ ایک دوسرے کی شرمگاہ کو دیکھ رہے ہوں گے۔ آپ نے فرمایا: اس دن لوگوں کو اس چیز کا دھیان ہی نہیں ہو گا۔ پھر رسول اللہ صلی اللہ علیہ وسلم نے یہ آیات پڑھیں: یَوْمَ یَفِرُّ الْمَرْءُ مِنْ اَخِیْہِ وَ اُمِّہٖ وَ اَبِیْہِ وَ صَاحِبَتِہٖ وَ بَنِیْہِ لِکُلِّ امْرِءٍٔ مِّنْھُمْ یَوْمَئِذٍ شَاْنٌ یُّغْنِیْہِ (عبس: 34 تا 37) ” اس دن بھاگے گا آدمی اپنے بھائی سے اور ماں، باپ، بیوی اور بیٹوں سے ان میں سے ہر ایک کو اس دن ایک فکر ہے کہ وہی اسے بس ہے۔“ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے ان لفظوں کے ہمراہ نقل نہیں کیا۔ تاہم امام بخاری رحمۃ اللہ علیہ اور امام مسلم رحمۃ اللہ علیہ نے حاتم بن ابی صغیرہ پھر ابی ملیکہ پھر قاسم کے واسطے سے سیدہ عائشہ رضی اللہ عنہا سے یہ روایت مختصر بیان کی ہے۔ [المستدرك على الصحيحين/كِتَابُ التَّفْسِيرِ/حدیث: 3942]

سیدنا ابی بن کعب رضی اللہ عنہ اللہ تعالیٰ کے ارشاد: وَّ حُمِلَتِ الْاَرْضُ وَ الْجِبَالُ فَدُکَّتَا دَکَّۃً وَّاحِدَۃً (الحاقۃ: 14) ” اور زمین اور پہاڑ اٹھا کر دفعتاً چورا چورا کر دیئے جائیں گے “۔ کے بارے میں فرماتے ہیں: یہ کافروں کے سامنے غبار ہو جائیں گے تاہم مومنوں کے سامنے ایسا نہیں ہو گا اور یہی مطلب ہے اللہ تعالیٰ کے ارشاد: وَ وُجُوْہٌ یَّوْمَئِذٍ عَلَیْھَا غَبَرَۃٌ تَرْھَقُھَا قَتَرَۃٌ (عبس: 40، 41) ” اور کتنے مونہوں پر اس دن گرد پڑی ہو گی، ان پر سیاہی چڑھ رہی ہے، “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3943]