سیدنا عبداللہ بن عمرو رضی اللہ عنہ فرماتے ہیں: ایک آدمی رسول اللہ صلی اللہ علیہ وسلم کی خدمت میں حاضر ہوا اور بولا: یا رسول اللہ صلی اللہ علیہ وسلم ! مجھے قرآن پڑھائیے۔ رسول اللہ صلی اللہ علیہ وسلم نے اسے فرمایا:” راء والی سورتوں میں تین پڑھ لو “ اس نے کہا: میں بوڑھا ہو چکا ہوں، میرا دل سخت ہو چکا ہے اور میری زبان بھی گاڑھی ہوچکی ہے۔ آپ نے فرمایا: تو ” حم والی سورتوں میں سے تین پڑھ لو “ اس نے پھر وہی جواب دیا۔ آپ نے فرمایا:” سبحات میں سے تین پڑھو لو “۔ اس نے پھر وہی جواب دیا۔ اس نے کہا: یا رسول اللہ صلی اللہ علیہ وسلم ! مجھے کوئی جامع سورۃ پڑھا دیں، تو رسول اللہ صلی اللہ علیہ وسلم نے اس کو سورۃ الزلزال پڑھائی۔ جب پڑھا کر فارغ ہوئے تو اس آدمی نے کہا: اس ذات کی قسم! جس نے آپ کو حق کے ساتھ بھیجا ہے۔ میں اس سے زیادہ ہرگز نہیں پڑھوں گا۔ پھر وہ آدمی چلا گیا تو رسول اللہ صلی اللہ علیہ وسلم نے ارشاد فرمایا: یہ آدمی کامیاب ہو گیا پھر آپ نے اس چیز کا ذکر کیا جو اس کو استقامت دے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4008]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے یہ آیت پڑھی: یَوْمَئِذٍ تُحَدِّثُ اَخْبَارَھَا ” اس دن وہ اپنی خبریں بتائے گی۔“ اور فرمایا: کیا تم جانتے ہو کہ اس کی خبریں کیا ہیں؟ صحابہ کرام رضوان اللہ علیہم اجمعین نے عرض کی: اللہ اور اس کا رسول بہتر جانتے ہیں۔ آپ نے فرمایا: اس کی خبریں یہ ہوں گی کہ وہ ہر مرد اور عورت کے ان تمام اعمال کی گواہی دے گی جو اس نے اس کی پشت پر کئے ہوں گے۔ وہ کہے گی: اس نے فلاں دن یہ کام کیا۔ یہ اس کی خبریں ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4009]

ابواسماء الرحبی کا بیان ہے کہ ایک دفعہ سیدنا ابوبکر صدیق رضی اللہ عنہ رسول اللہ صلی اللہ علیہ وسلم کے ہمراہ ناشتہ کر رہے تھے کہ یہ آیت نازل ہوئی: فَمَنْ یَّعْمَلْ مِثْقَالَ ذَرَّۃٍ خَیْرًا یَّرَہٗ وَ مَنْ یَّعْمَلْ مِثْقَالَ ذَرَّۃٍ شَرًّا یَّرَہٗ (الزلزلۃ: 7، 8) ” جو ایک ذرہ بھر بھلائی کرے اسے دیکھے گا، اور جو ایک ذرہ بھر برائی کرے اسے دیکھے گا۔“ تو سیدنا ابوبکر رضی اللہ عنہ رک گئے اور عرض کی: یا رسول اللہ صلی اللہ علیہ وسلم ! کیا ہم نے جو بھی برا عمل کیا، وہ دیکھیں گے؟ تو آپ نے فرمایا: جو تم تکالیف دیکھتے ہو یہ تمہارا بدلہ ہے اور نیکیاں، نیک لوگوں کے لئے آخرت کے لئے ذخیرہ کر لی جاتی ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4010]