سیدنا عبداللہ بن شخیر رضی اللہ عنہ فرماتے ہیں: میں نبی اکرم صلی اللہ علیہ وسلم کی خدمت میں حاضر ہوا، اس وقت آپ ” اَلْھَاکُمُ التَّکَاثُرُ “ پڑھ رہے تھے۔ آپ فرما رہے تھے: بندہ کہتا ہے: میرا مال، میرا مال حالانکہ اس کا مال تو صرف وہ ہے جو ” اس نے کھایا اور ختم کر دیا “،” پہنا اور پرانا کر دیا “ یا ” صدقہ کیا اور آخرت کے لئے بچا لیا “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ اور یہ شیخین رحمۃ اللہ علیہما کے معیار کے مطابق نہیں ہے اور عبداللہ بن شخیر کا راوی اس کے بیٹے مطرف سے علاوہ اور کوئی نہیں ہے۔ ہم نے غور کیا تو امام مسلم رحمۃ اللہ علیہ نے شعبہ کی حدیث، قتادہ رضی اللہ عنہ کے حوالے سے مختصراً نقل کی ہے۔ [المستدرك على الصحيحين/كِتَابُ التَّفْسِيرِ/حدیث: 4013]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مجھے تم پر فقر کا خوف نہیں ہے بلکہ مجھے تمہارے بارے میں مال کی زیادہ طلبی کا خوف ہے اور مجھے تم پر خطا کا خوف نہیں ہے بلکہ جان بوجھ کر گناہ کرنے کا خوف ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4014]