سیدنا عبداللہ بن عباس رضی اللہ عنہما فرماتے ہیں: اصحاب الفیل جب مکۃ المکرمہ کے قریب پہنچے تو عبدالمطلب ان کے سامنے آئے اور ان کے سردار سے کہا: تم ہمارے پاس کیوں آئے ہو، تم نے کوئی پیغام بھیج دیا ہوتا تو ہم آپ کی مطلوبہ ہر چیز تم تک خود پہنچا دیتے، اس نے کہا: مجھے پتہ چلا ہے کہ اس گھر میں جو بھی داخل ہو گا امن والا ہو گا۔ میں اس کے رہنے والوں کو ڈرانے آیا ہوں۔ عبدالمطلب نے کہا: تم جو چیز بھی چاہتے ہو ہم تمہیں دے دیتے ہیں لیکن تم واپس چلے جاؤ۔ لیکن وہ نہ مانا بلکہ داخل ہونے پر بضد رہا اور مکہ کی جانب پیش قدمی شروع کر دی۔ عبدالمطلب وہاں سے ہٹ کر پہاڑ پر جا کر کھڑے ہو گئے اور بولے: کوئی تخریب کار اس گھر اور اس کے اہل کے ہلاک کرنے کے لئے یہاں داخل نہیں ہو سکا، پھر کہا: اے اللہ تعالیٰ! ہر معبود کا حلال ہے تو اپنے حلال کی حفاظت فرما۔ ان کی کوشش تیری کوشش پر ہرگز غالب نہیں آئے گی۔ اے اللہ! میں کچھ نہیں کر سکتا، تو جو مناسب سمجھے وہی کر۔ چنانچہ دریا کی جانب سے بادلوں کی سی کوئی چیز آئی اور ان کو ابابیلوں نے اڑتے ہوئے گھیر لیا۔ اللہ تعالیٰ نے فرمایا: تَرْمِیْھِمْ بِحِجَارَۃٍ مِّنْ سِجِّیلٍ ” کہ انہیں کنکر کے پتھر مارتے “، آپ فرماتے ہیں: ہاتھی چیختا تھا۔ فَجَعَلَھُمْ کَعَصْفٍ مَّاْکُوْلٍ ” تو انہیں کر ڈالا جیسے کھائی کھیتی کی پتی “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 4018]