سیدنا ابن اسحاق رحمۃ اللہ علیہ کہتے ہیں: نجاشی کا اصل نام ” مصحمہ “ تھا۔ عربی میں اس کا مطلب ” عطیہ “ ہے۔ نجاشی تو اس ملک کے بادشاہ کا لقب تھا جیسے کسریٰ اور ہرقل۔ ابن اسحاق رحمۃ اللہ علیہ کہتے ہیں: یہ نبی اکرم صلی اللہ علیہ وسلم کی طرف سے نجاشی کی طرف مکتوب تھا۔ بسم اللہ الرحمن الرحیم۔ یہ خط ہے محمد رسول اللہ صلی اللہ علیہ وسلم کی جانب سے اصحم نجاشی عظیم الجیش کی طرف سلامتی ہو اس پر جس نے ہدایت کی پیروی کی اور اللہ تعالیٰ اور اس کے رسول صلی اللہ علیہ وسلم پر ایمان لایا اور اس بات کی گواہی دی کہ اللہ تعالیٰ کے سوا کوئی معبود نہیں وہ وحدہ لاشریک ہے، نہ اس کی کوئی بیوی ہے نہ بیٹا اور یہ کہ محمد اللہ کے بندے اور اس کے رسول ہیں۔ میں تجھے اللہ تعالیٰ کا پیغام پیش کرتا ہوں۔ کیونکہ میں اللہ تعالیٰ کا رسول ہوں تو اسلام قبول کر لے سلامتی پائے گا۔ یٰٓاَھْلَ الْکِتٰبِ تَعَالَوْا اِلٰی کَلِمَۃٍ سَوَآءٍ بَیْنَنَا وَ بَیْنَکُمْ اَلاَّ نَعْبُدَ اِلَّا اللّٰہَ وَ لَا نُشْرِکَ بِہٖ شَیْئًا وَّ لَا یَتَّخِذَ بَعْضُنَا بَعْضًا اَرْبَابًا مِّنْ دُوْنِ اللہِ (آل عمران: 64) ” تم فرماؤ! اے کتابیو! ایسے کلمہ کی طرف آؤ جو ہم میں تم میں یکساں ہے یہ کہ عبادت نہ کریں مگر خدا کی اور اس کا شریک کسی کو نہ کریں اور ہم میں کوئی ایک دوسرے کو رب نہ بنا لے اللہ کے سوا۔“ اور اگر تو انکار کرے تو تجھ پر نصاریٰ کا گناہ ہے۔ ٭٭ محمد بن اسحاق قرشی کی اس بات میں کسی نے متابعت نہیں کی کہ نجاشی کا نام مصحمہ تھا کیونکہ بخاری و مسلم میں صحیح احادیث موجود ہیں جن میں یہ نام الف کے ساتھ ہے اور ان میں رسول اللہ صلی اللہ علیہ وسلم کے مکتوب کا ذکر موجود ہے۔ [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4290]

سیدنا عبداللہ بن مسعود رضی اللہ عنہ فرماتے ہیں: رسول اللہ صلی اللہ علیہ وسلم نے ہمیں نجاشی کی طرف بھیجا۔ اس وقت ہم 80 کے لگ بھگ افراد تھے پھر اس کے بعد طویل حدیث بیان کی جیسا کہ میں نے کتاب التفسیر میں بیان کی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ اور علم کے طلبگار کو جاننا چاہئے کہ نجاشی وہ بادشاہ ہے جس نے صحابہ کرام رضوان اللہ علیہم اجمعین کے اس کے دربار میں پیش ہونے سے پہلے رسول اللہ صلی اللہ علیہ وسلم کا لکھا ہوا خط پھاڑ ڈالا تھا۔ اس بات پر دلیل وہ حدیث ہے جو امام بخاری رحمۃ اللہ علیہ اور امام مسلم رحمۃ اللہ علیہ نے اپنی صحیح میں درج کی ہے کہ ہشام بن عروہ اپنے والد کے حوالے سے روایت کرتے ہیں کہ ام المومنین سیدہ عائشہ رضی اللہ عنہا سے مروی ہے کہ ام سلمہ رضی اللہ عنہا اور ام حبیبہ رضی اللہ عنہا نے ایک گرجا کا ذکر کیا ہے جس میں تصاویر وغیرہ تھیں اور گرجا حبشہ میں ہی تھا۔ (الحدیث) [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4291]