جمیع بن عمیر لیثی فرماتے ہیں: میں سیدنا عبداللہ بن عمر رضی اللہ عنہما کے پاس آیا اور ان سے سیدنا علی رضی اللہ عنہ کے بارے میں سوال کیا۔ تو انہوں نے مجھے ڈانٹ دیا۔ پھر فرمایا: کیا میں تمہیں سیدنا علی رضی اللہ عنہ کے بارے میں نہ بتاؤں؟ مسجد میں یہ رسول اللہ صلی اللہ علیہ وسلم کا حجرہ ہے اور سیدنا علی رضی اللہ عنہ کا حجرہ ہے۔ بے شک رسول اللہ صلی اللہ علیہ وسلم نے سیدنا ابوبکر رضی اللہ عنہ اور سیدنا عمر رضی اللہ عنہ کو براءۃ کا اعلان کرنے کے لئے اہل مکہ کی طرف بھیجا۔ یہ دونوں چلے پڑے۔ تو ان کے سامنے ایک سوار آیا، انہوں نے اس سے پوچھا: تم کون ہو؟ اس نے جواباً کہا: اے ابوبکر رضی اللہ عنہ میں علی ہوں، اور وہ خط مجھے دو جو تمہارے پاس ہے۔ سیدنا ابوبکر رضی اللہ عنہ نے پوچھا: وہ کیوں؟ انہوں نے کہا: خدا کی قسم! میں بھلائی ہی جانتا ہوں۔ سیدنا علی رضی اللہ عنہ وہ خط لے کر آگے گئے اور سیدنا ابوبکر رضی اللہ عنہ اور سیدنا عمر رضی اللہ عنہ واپس چلے آئے اور آ کر عرض کی: یا رسول اللہ صلی اللہ علیہ وسلم ! ہم میں کیا کمی تھی؟ حضور صلی اللہ علیہ وسلم نے فرمایا: (تم میں کوئی کمی نہیں تھی بلکہ) تم میں بھلائی ہی بھلائی تھی لیکن مجھے یہ مشورہ دیا گیا تھا کہ یہ پیغام یا تو آپ خود دیں یا آپ کی طرف سے آپ کے خاندان کا کوئی فرد پہنچائے۔ ٭٭ یہ حدیث شاذ ہے۔ اس میں جمیع بن عمیر پر اس کے بعد اسحاق بن بشر پر حمل ہے۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4422]

سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم نے سیدنا ابوبکر رضی اللہ عنہ کو بھیجا اور ان کو حکم دیا کہ ان باتوں کا اعلان کر دو، پھر سیدنا علی رضی اللہ عنہ کو ان کے پیچھے روانہ کر دیا۔ سیدنا ابوبکر رضی اللہ عنہ ابھی راستہ ہی میں تھے کہ ان کو رسول اللہ صلی اللہ علیہ وسلم کی اونٹنی کی آواز سنائی دی۔ تو سیدنا ابوبکر رضی اللہ عنہ گھبرا کر اس آواز کی طرف چل پڑے وہ سمجھے کہ شاید رسول اللہ صلی اللہ علیہ وسلم تشریف لا رہے ہیں۔ جب پاس پہنچے تو وہ سیدنا علی رضی اللہ عنہ تھے۔ سیدنا ابوبکر رضی اللہ عنہ نے رسول اللہ صلی اللہ علیہ وسلم کا وہ مکتوب سیدنا علی رضی اللہ عنہ کے حوالے کیا جس کا حج کے موقع پر اعلان کرنے کا حکم تھا۔ اور سیدنا علی رضی اللہ عنہ سے کہا: ان کلمات کا اعلان کر دینا۔ سیدنا علی رضی اللہ عنہ ایام تشریق میں کھڑے ہوئے اور اعلان کر دیا کہ اللہ اور اس کا رسول صلی اللہ علیہ وسلم مشرکوں سے بیزار ہیں۔ تم زمین میں چار ماہ تک چل پھر لو اور اس سال کے بعد نہ کسی مشرک کو حج کرنے کی اجازت ہو گی اور نہ کوئی ننگے ہو کر بیت اللہ کا طواف کرے گا۔ اور جنت میں صرف ایمان والا ہی جائے گا۔ سیدنا علی رضی اللہ عنہ مسلسل یہ اعلان کرتے رہے حتی کہ ان کی اونٹنی بیٹھ گئی۔ تو پھر سیدنا ابوہریرہ رضی اللہ عنہ اٹھ کر کھڑے ہوئے اور انہوں نے اعلان کرنا شروع کر دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس اعلان کی وضاحت کے ہمراہ درج ذیل صحیح حدیث بھی موجود ہے۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4423]

سیدنا زید بن یثیع رضی اللہ عنہ فرماتے ہیں: ہم نے سیدنا علی رضی اللہ عنہ سے پوچھا: آپ کو کیا پیغام دے کر حج کے موقع پر بھیجا گیا تھا؟ انہوں نے فرمایا: چار چیزیں تھیں (1) جنت میں صرف ایمان والا ہی جا سکتا ہے۔ (2) کسی کو بیت اللہ کا طواف برہنہ حالت میں کرنے کی اجازت نہیں۔ (3) اس سال کے بعد مسجد حرام میں مومن اور کافر اکٹھے نہیں ہوں گے۔ (4) جس کا نبی اکرم صلی اللہ علیہ وسلم کے ساتھ کسی مقررہ میعاد تک معاہدہ تھا اس کا معاہدہ اس کی میعاد تک پورا کیا جائے گا اور جس کے ساتھ کوئی معاہدہ نہیں ہوا تھا ان کو چار ماہ کی مہلت دی جاتی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4424]