سیدنا سفینہ رضی اللہ عنہ سے روایت ہے، انہوں نے کہا: رسول اللہ صلی اللہ علیہ وسلم جب صبح کی نماز پڑھا لیتے تو دریافت فرماتے: ”آج رات تم میں سے کسی نے کوئی خواب دیکھا ہے؟“ ایک دن آپ صلی اللہ علیہ وسلم نے صبح کی نماز پڑھائی، پھر اپنے صحابہ کی طرف متوجہ ہو کر دریافت فرمایا: ”تم میں سے کس نے کوئی خواب دیکھا ہے؟“ ایک شخص نے عرض کیا: اے اللہ کے رسول! میں نے دیکھا ہے گویا آسمان سے ایک ترازو لٹکایا گیا، پھر آپ کو ایک پلڑے میں اور ابوبکر کو دوسرے پلڑے میں رکھا گیا تو آپ کا پلڑا ابوبکر سے بھاری رہا، پھر آپ کو اٹھا لیا گیا اور ابوبکر وہیں رہے، پھر عمر بن خطاب کو لا کر دوسرے پلڑے میں رکھا گیا تو ابوبکر کا پلڑا عمر سے بھاری رہا، پھر ابوبکر کو اٹھا لیا گیا اور عمر وہیں رہے، پھر عثمان بن عفان کو لا کر دوسرے پلڑے میں رکھا گیا تو عمر کا پلڑا عثمان سے بھاری رہا، پھر ان دونوں کو بھی اٹھا لیا گیا اور ترازو بھی اٹھا لیا گیا۔ راوی کہتے ہیں: (یہ سن کر) رسول اللہ صلی اللہ علیہ وسلم کے چہرہ مبارک کا رنگ بدل گیا، پھر آپ صلی اللہ علیہ وسلم نے فرمایا: ”خلافتِ نبوت تیس سال رہے گی، اس کے بعد بادشاہت ہوگی۔“ سعید بن جمہان کہتے ہیں: مجھ سے سفینہ رضی اللہ عنہ نے کہا: (ان سالوں کو) شمار کر لو: ابوبکر کے دو سال، عمر کے دس سال، عثمان کے بارہ سال اور علی کے چھ سال (رضی اللہ عنہم اجمعین)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4487]

سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”آج رات ایک صالح شخص کو خواب دکھایا گیا کہ ابوبکر رسول اللہ صلی اللہ علیہ وسلم کے ساتھ پیوست ہیں، عمر ابوبکر کے ساتھ پیوست ہیں اور عثمان عمر کے ساتھ پیوست ہیں۔“ سیدنا جابر رضی اللہ عنہ نے کہا: جب ہم نبی کریم صلی اللہ علیہ وسلم کے پاس سے اٹھے تو ہم نے کہا کہ وہ ”صالح شخص“ تو خود نبی کریم صلی اللہ علیہ وسلم ہی ہیں، اور ان کا ایک دوسرے کے ساتھ پیوست ہونے کا ذکر اس بات کی طرف اشارہ ہے کہ وہ اس امر (خلافت) کے والی ہوں گے جس کے ساتھ اللہ نے اپنے نبی صلی اللہ علیہ وسلم کو مبعوث فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4488]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”خلافت مدینہ میں ہوگی اور بادشاہت شام میں ہوگی۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4489]

سیدنا علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: «رَحِمَ اللَّهُ أَبَا بَكْرٍ، زَوَّجَنِي ابْنَتَهُ، وَحَمَلَنِي إِلَى دَارِ الْهِجْرَةِ.» ”اللہ تعالیٰ ابوبکر پر رحم فرمائے، انہوں نے اپنی صاحبزادی کا نکاح مجھ سے کیا اور مجھے ہجرت کے گھر (مدینہ) تک پہنچایا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4490]

سیدنا عبداللہ بن عمر رضی اللہ عنہما سے روایت ہے کہ جب فتح مکہ کے سال رسول اللہ صلی اللہ علیہ وسلم (مکہ میں) داخل ہوئے تو آپ صلی اللہ علیہ وسلم نے عورتوں کو دیکھا کہ وہ اپنے دوپٹوں سے گھوڑوں کے چہروں کو مار رہی ہیں، آپ صلی اللہ علیہ وسلم نے سیدنا ابوبکر رضی اللہ عنہ کی طرف دیکھ کر تبسم فرمایا اور پوچھا: ”اے ابوبکر! حسان بن ثابت نے (اس بارے میں) کیا کہا تھا؟“ تو سیدنا ابوبکر رضی اللہ عنہ نے انہیں یہ اشعار سنائے: ”میں اپنی بیٹی سے محروم ہو جاؤں اگر تم ان (گھوڑوں) کو کداء کے دونوں اطراف سے گرد اڑاتے ہوئے نہ دیکھو، وہ تیز رفتاری سے نیزوں کو کھینچ رہے ہوں گے اور عورتیں اپنے دوپٹوں سے ان (گھوڑوں) کو مار رہی ہوں گی۔“ تو رسول اللہ صلی اللہ علیہ وسلم نے فرمایا: ”وہیں سے داخل ہو جاؤ جہاں کا ذکر حسان نے کیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4491]

سیدنا عبداللہ بن مسعود رضی اللہ عنہ سے روایت ہے، انہوں نے کہا کہ ہم نبی کریم صلی اللہ علیہ وسلم کے پاس بیٹھے تھے کہ آپ صلی اللہ علیہ وسلم نے فرمایا: ”ابھی تمہارے سامنے ایک جنتی شخص نمودار ہوگا“، چنانچہ سیدنا ابوبکر رضی اللہ عنہ نمودار ہوئے، سلام کیا اور بیٹھ گئے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4492]