عبدالرحمن بن ابی لیلیٰ سے روایت ہے کہ سیدنا علی رضی اللہ عنہ سن 40 ہجری میں 17 رمضان المبارک کی شب بروز جمعہ شہید کیے گئے، آپ کی مدتِ خلافت تین ماہ کم پانچ سال تھی، آپ کو عبدالرحمن بن ملجم مرادی نے شہید کیا اور شہادت کے وقت آپ کی عمر تریسٹھ یا چونسٹھ سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4639]

ابوبکر بن ابی شیبہ سے روایت ہے کہ سیدنا علی بن ابی طالب رضی اللہ عنہ پانچ سال تک خلیفہ رہے اور رسول اللہ صلی اللہ علیہ وسلم کی ہجرت کے چالیسویں سال شہید ہوئے، اس وقت ان کی عمر تریسٹھ سال تھی، انہیں 21 رمضان المبارک بروز جمعہ (زخمی کر کے) شہید کیا گیا اور ان کا انتقال اتوار کے روز ہوا جبکہ وہ کوفہ میں دفن کیے گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4640]

ابوسنان الدؤلی سے روایت ہے کہ انہوں نے سیدنا علی رضی اللہ عنہ کی بیماری کے دوران ان کی عیادت کی، وہ کہتے ہیں کہ میں نے ان سے کہا: اے امیر المؤمنین! ہمیں آپ کی اس بیماری کے بارے میں بہت فکر اور اندیشہ ہوا، تو انہوں نے فرمایا: ”لیکن اللہ کی قسم مجھے اس سے اپنی جان کا کوئی خوف نہیں تھا کیونکہ میں نے صادق و مصدوق رسول اللہ صلی اللہ علیہ وسلم کو یہ فرماتے ہوئے سنا ہے: بے شک تمہیں یہاں اور یہاں (اور آپ نے اپنی دونوں کنپٹیوں کی طرف اشارہ کیا) ضرب لگائی جائے گی یہاں تک کہ ان سے خون بہہ نکلے گا اور تمہاری داڑھی اس سے رنگین ہو جائے گی، اور ایسا کرنے والا شخص سب سے زیادہ بدبخت ہوگا بالکل اسی طرح جیسے اونٹنی کی کونچیں کاٹنے والا قومِ ثمود کا سب سے بڑا بدبخت تھا۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4641]