ابن شہاب زہری سے روایت ہے کہ میں جہاد کے ارادے سے دمشق پہنچا اور عبدالملک (بن مروان) کو سلام کرنے کے لیے ان کے پاس گیا، میں نے انہیں ایک قبے میں بلند نشست پر پایا، میں نے سلام کیا اور بیٹھ گیا، انہوں نے مجھ سے پوچھا: اے ابن شہاب! کیا آپ جانتے ہیں کہ جس صبح سیدنا علی بن ابی طالب رضی اللہ عنہ شہید ہوئے اس دن بیت المقدس میں کیا ہوا تھا؟ میں نے عرض کیا: جی ہاں، انہوں نے کہا: قریب آؤ، میں لوگوں کے پیچھے سے ہو کر قبے کے پچھلی جانب ان کے قریب پہنچا تو انہوں نے اپنا چہرہ میری طرف موڑا اور میری طرف جھک کر پوچھا: کیا ہوا تھا؟ میں نے عرض کیا: اس دن بیت المقدس کا جو بھی پتھر اٹھایا جاتا اس کے نیچے سے خون برآمد ہوتا تھا، انہوں نے کہا: اب میرے اور تمہارے سوا اس بات کو جاننے والا کوئی نہیں بچا، لہذا یہ بات کسی اور کو نہ بتانا، چنانچہ میں نے ان کی وفات تک یہ بات کسی سے بیان نہیں کی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4642]