سیدنا ابویحیی فرماتے ہیں: ایک متشدد آدمی نے سیدنا علی رضی اللہ عنہ کو نماز فجر کے دوران آواز دی اور (قرآن کریم کی یہ آیت پڑھتے ہوئے) بولا: وَلَقَدْ اُوْحِیَ اِلَیْکَ وَاِلَی الَّذِیْنَ مِنْ قَبْلِکَ لَئِنْ اَشْرَکْتَ لَیَحْبِطَنَّ عَمَلُکَ وَلَتَکُوْنَنَّ مِنَ الْخَاسِرِیْنَ (الزمر: 65) ” اور بے شک وحی کی گئی تمہاری طرف اور تم سے اگلوں کی طرف کہ اے سننے والے اگر تو نے اللہ کا شریک کیا تو ضرور تیرا سب کیا دھرا اکارت جائے گا اور ضرور تو ہار میں رہے گا “ سیدنا علی رضی اللہ عنہ نے اس کو دوران نماز (یہ آیات پڑھتے ہوئے جواب دیا) فرمایا: فَاصْبِرْ اِنَّ وَعْدَاللّٰہِ حَقٌ وَّلَا یَسْتَخِفَّنَّکَ الَّذِیْنَ لَا یُوْقِنُوْنَ (الروم: 60) ” تو صبر کرو بے شک اللہ کا وعدہ سچا اور تمہیں سبک نہ کر دیں وہ جو یقین نہیں رکھتے “ نوٹ: ان احادیث کی سند صحیح ہے تاہم یہ مسند نہیں ہیں اس لئے میں ان کے بارے میں قانون کے مطابق حکم جاری کرتا ہوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4755]

ام المومنین سیدہ ام سلمہ فرماتی ہیں: یہ آیت میرے گھر میں نازل ہوئی اِنَّمَا یُرِیْدُ اللّٰہُ لِیُذْھِبَ عَنْکُمُ الرِّجْسَ اَھْلَ الْبَیْتِ (الاحزاب: 33) ” اللہ تو یہی چاہتا ہے اے نبی کے گھر والو کہ تم سے ہر ناپاکی دور فرما دے “ آپ فرماتی ہیں: (اس آیت کے نزول کے بعد) رسول اللہ صلی اللہ علیہ وسلم نے سیدنا علی، سیدہ فاطمہ، سیدنا حسن اور سیدنا حسین رضی اللہ عنہم کو بلایا اور کہا: اے اللہ! یہ میرے گھر والے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4756]

سیدنا واثلہ بن اسقع رضی اللہ عنہ فرماتے ہیں: میں سیدنا علی رضی اللہ عنہ سے ملنے کے لئے گیا، آپ گھر موجود نہ تھے، سیدہ فاطمہ رضی اللہ عنہا نے مجھے بتایا کہ رسول اللہ صلی اللہ علیہ وسلم نے ان کو بلایا تھا وہ آپ صلی اللہ علیہ وسلم کے پاس گئے ہیں۔ پھر وہ رسول اللہ صلی اللہ علیہ وسلم کے ہمراہ گھر آ گئے، وہ دونوں گھر میں داخل ہوئے تو میں بھی ان کے ہمراہ داخل ہو گیا، حضور صلی اللہ علیہ وسلم نے سیدنا حسن اور سیدنا حسین رضی اللہ عنہما کو بلایا، آپ نے ان دونوں کو اپنی رانوں پر بٹھایا، سیدہ فاطمہ رضی اللہ عنہا اور سیدنا علی رضی اللہ عنہ کو بھی اپنے قریب کیا، ان سب کے اوپر ایک چادر ڈال کر یہ آیت پڑھی: اِنَّمَا یُرِیْدُ اللّٰہُ لِیُذْھِبَ عَنْکُمُ الرِّجْسَ اَھْلَ الْبَیْتِ وَیُطَھِّرَکُمْ تَطْھِیْرًا (الاحزاب: 33) ” اللہ تو یہی چاہتا ہے اے نبی کے گھر والو کہ تم سے ہر ناپاکی دور فرما دے “ پھر فرمایا: اے اللہ! یہ میرے اہل بیت ہیں، اے اللہ میرے اہل بیت زیادہ حقدار ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن دونوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4757]

ام المومنین سیدہ عائشہ صدیقہ رضی اللہ عنہا فرماتی ہیں: ایک دفعہ رسول اللہ صلی اللہ علیہ وسلم صبح کے وقت باہر نکلے اس وقت آپ اپنے اوپر سیاہ اون کی منقش چادر مبارک اوڑے ہوئے تھے، اتنے میں سیدنا حسن رضی اللہ عنہ اور سیدنا حسین رضی اللہ عنہ تشریف لے آئے، آپ نے ان دونوں کو اس چادر میں چھپا لیا پھر سیدہ فاطمہ رضی اللہ عنہا تشریف لے آئیں، آپ نے ان کو بھی اس میں چھپا لیا، پھر سیدنا علی رضی اللہ عنہ تشریف لائے، آپ صلی اللہ علیہ وسلم نے ان کو بھی اس میں چھپا لیا، پھر آپ نے یہ آیت تلاوت کی اِنَّمَا یُرِیْدُ اللّٰہُ لِیُذْھِبَ عَنْکُمُ الرِّجْسَ اَھْلَ الْبَیْتِ وَیُطَھِّرَکُمْ تَطْھِیْرًا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4758]