ابوتحییٰ سے روایت ہے کہ غلو کرنے والے ایک شخص نے سیدنا علی رضی اللہ عنہ کو اس وقت پکار کر کہا جب وہ نمازِ فجر پڑھا رہے تھے: ﴿وَلَقَدْ أُوحِيَ إلَيْكَ وَإِلَى الَّذِينَ مِن قَبْلِكَ لَئِنْ أَشْرَكْتَ لَيَحْبَطَنَّ عَمَلُكَ وَلَتَكُونَنَّ مِنَ الخَاسِرِينَ﴾ ”اور یقیناً آپ کی طرف اور ان کی طرف جو آپ سے پہلے تھے یہ وحی کی گئی ہے کہ اگر آپ نے شرک کیا تو ضرور آپ کے عمل ضائع ہو جائیں گے اور آپ خسارہ پانے والوں میں سے ہو جائیں گے۔“ [سورة الزمر: 65] ، تو سیدنا علی رضی اللہ عنہ نے نماز ہی کی حالت میں اسے یہ جواب دیا: ﴿فَأَصْبِرْ إِنَّ وَعْدَ اللَّهِ حَقّ وَلَا يَسْتَخِفَنَّكَ الَّذِينَ لَا يُوقِنُونَ﴾ ”پس آپ صبر کریں، بے شک اللہ کا وعدہ سچا ہے اور وہ لوگ آپ کو ہرگز بے صبرا نہ کریں جو یقین نہیں رکھتے۔“ [سورة الروم: 60]
امام حاکم فرماتے ہیں کہ یہ احادیث صحیح الاسناد ہیں اگرچہ یہ مسند (مرفوع) نہیں ہیں، پس میں نے ان پر اسی قاعدے کے مطابق حکم لگایا ہے جو رائج ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4755]

ام المومنین سیدہ ام سلمہ رضی اللہ عنہا سے روایت ہے، انہوں نے کہا: میرے گھر میں یہ آیت نازل ہوئی: ﴿إِنَّمَا يُرِيدُ اللَّهُ لِيُذْهِبَ عَنكُمُ الرِّجْسَ أَهْلَ البَیتِ﴾ ”اللہ تو یہی چاہتا ہے کہ تم سے گندگی دور کر دے اے گھر والو! اور تمھیں پاک کر دے۔“ [سورة الأحزاب: 33] ، وہ کہتی ہیں کہ پھر رسول اللہ صلی اللہ علیہ وسلم نے سیدنا علی، سیدہ فاطمہ، سیدنا حسن اور سیدنا حسین رضی اللہ عنہم کو بلوایا اور فرمایا: ”یہ میرے اہل بیت ہیں۔“
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4756]

سیدنا واثلہ بن اسقع رضی اللہ عنہ سے روایت ہے، وہ کہتے ہیں کہ میں سیدنا علی رضی اللہ عنہ کے پاس آیا تو انہیں وہاں نہ پایا، سیدہ فاطمہ رضی اللہ عنہا نے مجھ سے کہا کہ وہ رسول اللہ صلی اللہ علیہ وسلم کو بلانے گئے ہیں، پھر وہ رسول اللہ صلی اللہ علیہ وسلم کے ساتھ تشریف لائے اور گھر میں داخل ہوئے تو میں بھی ان کے ساتھ اندر چلا گیا، رسول اللہ صلی اللہ علیہ وسلم نے سیدنا حسن اور سیدنا حسین کو بلایا اور ان دونوں میں سے ہر ایک کو اپنی ایک ران پر بٹھایا، اور سیدہ فاطمہ اور ان کے شوہر (سیدنا علی) کو اپنے قریب کیا، پھر ان پر ایک چادر تان لی اور فرمایا: ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ ”اللہ تو یہی چاہتا ہے کہ اے نبی کے گھر والو! تم سے ناپاکی دور کر دے اور تمہیں پوری طرح پاک کر دے۔“ [سورة الأحزاب: 33] ، پھر فرمایا: ”یہ میرے اہل بیت ہیں، اے اللہ! میرے یہ اہل زیادہ حقدار ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4757]

ام المومنین سیدہ عائشہ رضی اللہ عنہا سے روایت ہے، انہوں نے کہا: نبی کریم صلی اللہ علیہ وسلم ایک صبح باہر تشریف لائے اور آپ صلی اللہ علیہ وسلم پر سیاہ بالوں سے بنی ہوئی ایک منقش چادر تھی، اتنے میں سیدنا حسن رضی اللہ عنہ آئے تو آپ صلی اللہ علیہ وسلم نے انہیں چادر کے اندر لے لیا، پھر سیدنا حسین رضی اللہ عنہ آئے تو انہیں بھی اندر لے لیا، پھر سیدہ فاطمہ رضی اللہ عنہا آئیں تو انہیں بھی اندر کر لیا، پھر سیدنا علی رضی اللہ عنہ آئے تو انہیں بھی ان سب کے ساتھ چادر میں شامل کر لیا، پھر فرمایا: ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ ”اللہ تو یہی چاہتا ہے کہ اے نبی کے گھر والو! تم سے ناپاکی دور کر دے اور تمہیں پوری طرح پاک کر دے۔“ [سورة الأحزاب: 33]
یہ حدیث امام بخاری اور امام مسلم کی شرط پر صحیح ہے لیکن انہوں نے اسے روایت نہیں کیا! [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4758]